Francis Jacobs den experiencia amargo ora autoridad a tene razzia den compleho di apartamento

Un situacion incomfortabel ora Husticia ta buscando cierto hendenan...

• Ciudadano Jacobs a bisa di a keda trauma 

ORANJESTAD (AAN): E conocido musico y productor di programa, y videografo, Francis Jacobs kende den pasado a yega di aparece riba lista politico tambe, a pasa un Diaranson anochi hopi malo den e Apartamento unda cu e ta biba pa 3 aña caba na Tanki Leendert.

   Despues di un dia cansa, e tabata drumi den su camber di e apartamento ta mira TV cu su headphone bisti.  Jacobs a splica cu semper e ta drumi sin paña bisti.  Esey ta loke el a declara den un video poni riba social media, pa splica den e momentonan di spanto y basta incomfortabel cu el a pasa aden.

   Tabata birando como 11:00 pm cu el a sinti sonido masha duro den su apartamento, sigui pa un otro boroto mas.  Diripiente un luz blanco y fuerte a wordo ilumina den su cara, cu e ordo: “Para keto!  Kedabo keto!”  Despues cu su wowo a acostumbra cu e briyo cla di luz, el a bin nota cu ta Agentenan Policial ta den su camber.

   Un di e Polisnan a rek y pasa Francis un paña interior, y a dun’e ordo pa e bisti esaki.  Despues di esey nan a pone cana, y nan a sak’e pafo di e Apartamento.  Ora di yega pafo, el a bin nota cu hendenan di tur e otro Apartamentonan tambe ta pafo, di cual varios poni abao pa drumi na piso, y tin otronan cu ta wanta keto bay door di Polis.

   Jacobs a splica cu e tabata e unico cu nan a sac’e pafo bisti na paña interior.  El a bisa cu esey ta algo hopi incomfortabel.  “E no ta facil, pa un persona conoci como ami,” el a declara riba e video.

   Tur hende pafo di e compleho di apartamento mester a keda warda, pa asina Polisnan haci nan trabao cu e ‘Entrada Hudicial’, cu tabata pa purba gara hendenan cu ta wordo busca door di ley.  Pues hendenan cu tabata haciendo cosnan ilegal contra ley, y cu nan a haya indicacion ta biba of keda na e compleho di Apartamento ey.

   Ora cu Fiscal a yega pa check e situacion, Jacobs a declara cu el a pidi e Fiscal pa por fabor si nan kier listra cosnan di dje, bay busca den su camber y apartamento, pa asina keda cla.  Pasobra e no kier keda manteni asina ey mas pafo di bisti cu djis su paña interior.

   El a splica cu e tabata e unico na paña interior entre tur esnan cu tabata wordo teni pafo den e area.  Otronan tabatin e.o. carson largo bisti, etc.

   “Un experiencia hopi amargo,” Jacobs a bisa.  El a agrega cu despues di e razzia, e no a drumi mas henter marduga.  El a graba e video alrededor di 6:15 am y ainda por mira su wowonan yen di soño, pero keto bay visibelmente spanta di e experiencia aki.

   “Mi sa cu nan tabata haciendo nan trabao, y ami a ‘paga’ pa otronan cu ta haciendo malo,” Jacobs a agrega.  El a bisa ademas cu doño di e compleho di apartamento no tin culpa pasobra e no por sa nunca ta kendenan ta esnan cu ta haci baina.

   Francis Jacobs tabata hopi emocional grabando e video, y a bisa cu algo cu nunca el a spera, cu lo a pasa, esta cu Polis a kibra su portanan pa drenta y sake forzosamente.  El a keda trauma pa e asunto, y pesey no por a drumi, y no ta algo facil pa procesa despues di a pasa den dje.

   El a sinti con den e bida aki, e sernan humano cu ta canando e caminda corecto, ta haya nan ta “paga pa e daño” pa e fechoria cu delincuentenan ta haci riba caya.  Den su caso, Polis a pasa check tur Apartamento pa mira den cua di nan e delincuente(nan) ta kedando, y pa malasuerte el a wordo saca tambe pa bay para pafo.  El a suplica Fiscal pa no manten’e mas asina ey pafo, entre tur e demas hendenan presente.  Pasobra di berdad Francis Jacobs no ta djis un hende.

   E ta un persona kende for di chikito a forma su mes, a bira popular principalmente den mundo di musica y entretenimento na Aruba.  Y el a sinti su mes hopi humiya cu el a wordo teni pafo casi full sunu pa asina hopi tempo.

   Na final el a indica cu “Polisnan a tratami bon, esey si mi tin di bisa... cu nan a tratami bon si,” Jacobs a declara encuanto e agentenan cu a tene e razzia.  Riba e potret por mira daño ocasiona na su porta di apartamento y porta di camber.

   E pregunta awor: Polis y Ministerio Publico lo ofrece disculpa ora cu nan destrui portanan y spanta ciudadano inocente asina den su hogar of no.