Fraccion di AVP y Futuro no ta realisa con importante ta pa Presupuesto 2025 keda trata y aproba

Minister Maduro ta lamenta

Presidente di Parlamento a schors e reunion pa tempo indefini 

ORANJESTAD (AAN): Gobernacion ta algo serio y pa varios aña  Minister Maduro di Finansa hunto cu su ekipo a traha incansablemente pa percura cu desde aña 2022 presupuestonan di Pais Aruba por a wordo entrega y trata na ora pa Parlamento di Aruba. Esaki ta necesario pa asina gobernacion por continua debidamente na unda debe por wordo paga y inversion por wordo haci na tempo.

Di e manera aki a logra pa presupuestonan di aña 2023, 2024 wordo entrega y trata na tempo. Presupuesto 2025 tambe a wordo entrega na tempo, sinembargo su tratamento ta tardando formalmente. Motibo pa esaki ta eleccion, tardansa den formacion di un Gobierno nobo, y e falta di prioridad di Presidente di Parlamento pa yama y trata Presupuesto 2025. 

Lamentablemente no ta tur politico ta serio den nan trabou y awe esaki ta keda demostra un bes mas ora cu porfin a yama tratamento di Presupuesto 2025, pero na mesun momento Presidente di Parlamento a schors e tratamento  pa tempo indefini. Motibo pa esaki ta un amienda pa cambia Presupuesto 2025 cu a wordo entrega pa Fraccion di AVP hunto cu Fraccion di Futuro. Como cu ta trata di cambionan grandi, esaki mester bay CAFT y Raad van Advies duna nan opinion. Un proceso cu lo trece mas tardansa den tratamento di Presupuesto 2025. 

E tardansa aki por a wordo evita si Parlamento por a djies bay de acuerdo cu Presupuesto 2025 cu ta “beleidsarm” y cu lo a keda cla atras pa e Gobierno nobo por a yega haci un Cambio di Comienso di aña y hinca nan maneho nobo aden. Di e manera aki por a percura cu Aruba por tabata tin un presupuesto 2025 cu cual por a sigui cumpli cu debernan financiero y tin autorisacion necesario pa paga debe y haci inversion.

Lamentablemente AVP y Futuro a scohe pa haci wega politico pa no trata Presupuesto 2025 y pa schors e tratamento pa tempo indefini cu tur consecuencia cu esaki tin pa e maneho financiero serio di nos Pais.