ORANJESTAD (AAN): Ta un honor pa AIB Bank yuda como consehero financiero principal den e esfuerzo pa e renovacion di nos Cas di Cultura; por medio di e proyecto yama "E Brasa".
AIB Bank ta compronde e impacto profundo cu Cas di Cultura tin riba nos comunidad, pero tambe riba nos bishitantenan pa kende hopi biaha ta Cas di Cultura ta un di e prome edificionan cu nan ta wak ora nan yega nos isla.
Ta pesey, den cuadro di su mandato social-economico, AIB Bank a ofrece pa duna su contribucion door di asisti Stichting Schouwburg Aruba cu nan meta ambicioso pa recauda e fondonan necesario pa sigura cu e edificio historico aki no solamente ta sobrevivi, pero ta wordo renoba den un centro cultural duradero y moderno y lo keda existi pa e siguiente añanan pa generacionnan di futuro disfruta di dje.
Cu experiencia extenso den tur aspecto di maneho financiero, maneho di alocacion di fondo, pero tambe Project Management, AIB Bank y su team ta sumamente bon prepara pa fungi como consehero financiero principal pa Stichting Schouwburg Aruba den e trayectoria aki. Ya caba, e team di Stichting Schouwburg Aruba a ranca sali y a recauda fondo pa e proyecto aki, recaudando casi 25% di e fondonan necesario.
AIB Bank ta encurasha su partnernan, y e comunidad di Aruba en general pa tambe contribui na e proyecto cu tanto significacion pa nos isla y participa na e fundraising. Hunto nos por sigura cu Cas di Cultura por sigui ta e lugar vibrante pa arte y pa generacionnan di futuro.
