Fraccion di AVP a pidi claridad crisis di Hospital y su futuro

ORANJESTAD (AAN) – Fraccion parlamentario di AVP a bishita directiva di Dr. Horacio E. Oduber Hospital pa un

combersacion amplio y constructivo tocante situacion actual di nos hospital, e desafionan financiero y operacional cu e institucion ta confronta y su perspectivanan pa futuro.

   Durante e encuentro, directiva di HOH a comparti informacion tocante e ultimo desaroyo, necesidad y preocupacionnan existente. Fraccion di AVP a expresa su preocupacion tocante e situacion, teniendo cuenta cu un hospital fuerte, stabiel y bon administra ta indispensabel pa garantisa continuidad y calidad di cuido medico pa pueblo di Aruba.

   Pa haya claridad completo y permiti parlamento cumpli debidamente cu su tarea di control, fraccion di AVP a solicita pa minister encarga cu salud publico presenta na un reunion di comision di salubridad. E fraccion ta considera necesario pa minister informa parlamento tocante situacion financiero real di HOH, e medidanan cu gobierno ta contempla y e garantianan cu lo establece pa evita cu servicio y cuido na pashent wordo afecta.

   “Salud no por depende di incertidumbre. Parlamento y pueblo di Aruba tin derecho riba informacion cla y transparente tocante situacion di nos hospital. Gobierno mester presenta un vision concreto y sostenibel pa futuro di HOH y pa cuido medico na Aruba,” Fraccion di AVP a declara.

   Segun Fraccion di AVP, claridad financiero y operacional ta necesario no solamente pa proteha pashent, sino tambe pa ofrece siguridad na dokter, nurse y tur otro profesional cu diariamente ta sostene funcionamento di hospital. Nan mester por conta cu e condicionnan, recursonan y sosten necesario pa cumpli cu nan responsabilidadnan.

   E fraccion ta enfatisa cu su peticion no tin como meta pa crea preocupacion adicional, sino pa obtene contestanan concreto y contribui na solucionnan responsabel. Un institucion cu tin un papel asina crucial den bienestar di comunidad mester por conta cu un maneho transparente, un base financiero sostenibel y un plan cla pa futuro.

   Fraccion di AVP lo sigui haci e preguntanan necesario, scucha profesionalnan activo den sector y traha constructivamente pa un sistema di salud accesibel, responsabel y di calidad pa tur ciudadano di Aruba.