Vogelbescherming Nederland ta reafirma su compromiso cu proteccion di Shoco di Aruba

Janske van de Crommenacker:

ORANJESTAD (AAN): Durante un entrevista, Janske van de Crommenacker, Program Manager Caribisch Nederland di Vogelbescherming Nederland, a papia tocante e sosten cu e organisacion ta brinda na e seis islanan Hulandes-Caribe, incluyendo Aruba. 

Segun Van de Crommenacker, pa por brinda e sosten corecto ta esencial pa scucha e organisacionnan y expertonan local. “E hendenan riba e islanan mes sa miho con e naturalesa y e diferente specienan ta funciona, y kico nan tin mester. Nos papel ta pa scucha, pensa hunto y mira unda nos por brinda sosten,” el a splica. 

E sosten di Vogelbescherming Nederland por inclui financiamento, intercambio di conocemento y experiencia, acceso na un red di profesional, educacion y comunicacion. E meta ta pa traha den cooperacion cu e organisacionnan local y fortalece e iniciativanan cu ya ta tumando luga riba e islanan. 

Van de Crommenacker a expresa su admiracion pa Shoco di Aruba, un especie unico cu solamente ta aparece riba nos isla. El a describi Shoco como un parha bunita y special, cu tur Arubiano por ta orguyoso di dje. Sinembargo, el a indica cu e parha emblematico aki ta enfrenta diferente menasa, particularmente pasobra Aruba ta un isla chikito cu hopi desaroyo y actividad. 

Vogelbescherming Nederland ta sigui e vision y ideanan di organisacionnan local manera Aruba Birdlife Conservation y Aruba Conservation Foundation. Un di e prioridadnan menciona ta creacion y proteccion di mas habitat natural, unda Shoco por biba y reproduci sin molester. 

Otro punto importante ta educacion. E organisacion kier contribui na desaroyo di material educativo y programanan dirigi na muchanan y hobennan. Segun Van de Crommenacker, hubentud ta futuro, y ta importante pa desde un edad tempran nan compronde e balor di Shoco y e necesidad pa proteha tanto e parha como su habitat natural. 

Door di cooperacion, educacion y proteccion efectivo di su habitat, Vogelbescherming Nederland ta spera di por contribui na un futuro mas sigur pa Shoco, un tesoro natural unico di Aruba.