Forsa femenino Grace tabata tin un encuentro exitoso riba Dia Internacional di Hende Muhe

ORANJESTAD (AAN): Forsa Femenino Grace na ocacion di Dia Internacional di Hende Muhe, diaranson anochi a organiza un encuentro exitoso pa hende muhe na Cede di MEP.

   E evento a cuminsa cu musica di entretenimento presenta pa un DJ mientras participantenan tabata yegando. Despues Presidente di Forsa Femenino Grace, Señora Fabiola Maduro a hiba palabra dunando bon bini na tur presente y a yama danki tambe na tur esnan cu a participa na e programa exitoso di Forsa Femenino Grace di Partido MEP.

   Señora Esmeralda Tromp y Señora Jenny Croes a duna discursonan motivacional y a impacta esnan presente cu e informacion cu nan a trece dilanti. Minister di Finanzas y Cultura Señora mr. Xiomara Maduro a elabora riba con su persona ta plania su dia como mama y Minister. Lider di MEP y Prome Minister di nos pais a hiba palabra tambe y a enfatisa riba e rol di hende muhe den hogar, comunidad y como lider di nos pais.

   Cantantenan Eltienne Yarzagaray y Quincy Hasham a deleita esnan presente cu nan bunita presentacion y canticanan dedica na hende muhe. Maestro di Ceremonia pa e anochi tabata ta Ruthlene Flemming kende a haci un bon trabao pa e programa cana segun schedule.

   Na final, a presenta e miembronan nobo di Forsa Femenino Grace como lo siguiente. Fabiola Maduro ta Presidente. Shannon Henriquez ta Vice Presidente. Secretaria ta Nancy Jager. Tesorero ta Tina Geerman-Quandus y Darlaine Guedez-Erasmus representando Forsa Femenino Grace den partijraad.

   Forsa Femenino Grace ta gradici tur cu a haci e anochi aki uno hopi special, bunita y exitoso.