Enfoque riba salud y bo riñon
ORANJESTAD (AAN): E fecha di 9 di Maart ta uno cu mundialmente ta dedica tur atencion riba e organo di riñon den e ser humano.
Den un entrevista cu Dr. Dennis Rasmijn, kende tin su consultorio di Docter di Cas na Bubali, el a mustra cu tur profesional medico ta pone atencion riba e fecha ey na e importancia di e riñon, con importante nan ta, y no djis informa loke e ta haci den e curpa humano, pero e hecho cu nan ta ‘gasta’ despues di tempo y ta haya problema, y esey ta algo cu sigur tin di pone atencion na dje.
Tambe segun e profesional medico, ta enfoca tambe kico ta e motibo realmente cu e riñon ta ‘gasta’, pasobra e problema di e organo aki ta aumentando mas ultimo temponan.
Na opinion di Dr. Rasmijn, comunidad di Aruba en general ta forma un reto grandi pa riñonnan, pasobra tur hende kier pa e organonan aki ta saludable. Con pa yega na un riñon saludable, ta si bo bida mes ta uno saludable. Esey nifica cu e comemento di tu dia mester ta manera debe ser, e presion di sanger mester ta bon regula, mester preveni cu tin demasiado sucu, presion halto, etc., pa asina bo por cuida bo riñon y evita cu nan ta bay atras.
“Aki na Aruba, e problema di riñon ta bira mas y mas grandi cu tempo, pasobra tin pashentnan cu ta haci dialysis pasobra esey ta hendenan di cual nan riñon a caba completo y no ta funciona mas, y esey ta un problema grandi,” Dr. Rasmijn a bisa.
El a bisa cu si bo analisa esaki na Aruba, e causa di dialysis cu ta un malesa hopi costoso y dificil, ta dos cos: (1) Sucu. (2) Presion halto.
Dr. Rasmijn a agrega cu Dialysis ta costa Aruba, principalmente AZV hopi placa pa mantene e proceso ey.
Pues e ta agrega, si tur pashent tin e dos causantenan ey bon regula, esta bo sucu y presion halto, anto por preveni un hende di yega na un situacion asina severo di Dialysis.
Pero e no ta algo cu ta bay facil, pasobra pa bo tin bo presion y sucu bon regula, ta hopi dificil. Pasobra e pashent mester ta na altura cu e tin presion halto, y esey nifica cu tin di bay Docter di Cas pa check e presion. Y esnan cu ya caba sa cu nan tin presion halto, tin di percura pa tuma nan remedi tur dia y come saludable, minimaliza salo y haci ehercicio. Esey ta valido tambe pa sucu.
