Nivel mundial alarmante di pobresa ta menasa e ser humano
*Maneho Ministro Glenbert Croes solucion pa elevacion di trabou
*Na November 2022 SER a splica barera forma pa falta educacion
ORANJESTAD (AAN) — E euforia causa pa e hecho cu Aruba a regresa na celebracion normal di dianan di fiesta, por tabata e motibo cu un rapport sumamente importante di e Conseho Social Economico (SER) di Aruba no a haya e atencion cu e merece.
Den e rapport di November 2022, e conseho cu ta consisti di representantenan di gremionan y expertonan local, a mustra e impacto di nivel di educacion riba e nivel di bida cu hende generalmente ta alcansa.
SER na November a tene su mes solamente na e parti di conocemento di idioma, pero e puntonan cu el a trece dilanti ta indicativo pa e impacto total di educacion riba hende y su desaroyo, crecemento y participacion activo den comunidad.
Un persona cu no ta capaz pa skirbi ni lesa, a forma un barera pa su mes sigur den nos mundo moderno cu den tur sector ta presenta retonan nobo pero tambe ta ofrece e vehiculonan di progreso personal, cu mester termina den e progreso nacional.
Mas y mas mundo ta realisa tambe, cu varios sector cu el a menosprecia, awe ta hustamente e container di oportunidadnan y hasta di exigencia pa desaroyo pa paisnan.
Ora analisa rapportnan, manera ta necesario pa por yega na informacionnan periodistico concreto, ta mira con prepacion educacional pa trabou na Aruba, a conoce diferente motibo.
Aruba a conoce un participacion na e sistema educacional mucho mas grandi cu mayoria di otro paisnan den su region, loke a haci e prijs di labor na Aruba mas caro.
Esaki a resulta den importacion fuera di proporcion di trahador cu ta exigi menos placa pero no tabata tin e nivel di preparacion cu e Arubiano tin.
E sector laboral du Aruba a crece cu nacemento pero tambe migracion hasta secreto.
Mientrastanto mundo a avansa riba tur tereno y conocemento basico a bira mas exigente den tur profesion.
Esaki tambe a duna contenido nobo na profesionnan cu un tempo a wordo desprecia, cu ta sona fastioso, pero ta e realidad cu cual mester atende.
Traha den agricultura, horticultura, cria y pesca, cu mester yena e exigencianan mas basico di un comunidad, a perde su balor den e proceso internacional di industrialisacion.
Awe hende ta bolbe campo cu respet pa e produccion di cuminda tan necesario pa paisnan por sobrevivi sigur den e crisis mundial actual, cu aumento enorme di prijsnan y menasa di hamber y pobresa creciente mundial.
Capacitacion, educacion profesional, cu antes tabata pasa di tata pa yiu pero awe ta exigi tur ramo eleva di educacion, ta duna contenido nobo na trabou den produccion di cuminda, den e base di sobrevivencia di hende.
Agricultura, horticultura y pesca, cria, no ta e unico ramonan cu ta duna prueba cu hende a duna balor robez na ramonan di produccion pa comunidad.
Hopi hende cu como hoben a neglisha oportunidadnan pa profesionalisa nan mes riba diferente tereno, awe kier deshaci di nan eror y sigui cursonan.
Den un mundo nobo, cu exigencianan nobo, gobierno mester duna asistencia na e hende cu kier capacita su mes riba su tereno den un economia mundial cu ta exigi hende pone man.
Enseñansa pa Emplea ta un pilar den e mundo profesional nobo y sigur nos mester sostene e decision di Ministro Glenbert Croes, pa crea mas profesional pa Aruba den un mundo exigente.
Ampliacion di conocemento, educacion, ta keda e base pa progreso di e ser humano y su participacion den su comunidad.
