FOR DI MI PEN-T-HOUSE

No ta tur hende a nace cu e suerte cu nan no ta traha y nan ta bida den Penthouse. Pero con bu bira e asunto, biba den un Penthouse dilanti lama, ta keda algo fascinante na nos dushi Aruba.

Penthouse ta pa e grupo priveligia cu ta mira strea di dia cla, pero esey no ta kita cu mi tambe por tin algo cu parecido di un Penthouse den DIARIO, caminda mi pen por recorda nos con gracioso mundo politico ta. 

“Mike ta mi ruman” ay palabra….

Eleccion 2021 ta algo special. Ay, tur hende ta grita nan Papa unda cu nan bira. Esaki hasta ta haci cu de bez en cuando hende por pensa, cu ta hamber nan tin y nan ta sclama pa papa pa yena nan stoma.

Awor den tur e asunto di papa, situacion a bay pega cu “Mike ta mi ruman” manera e propaganda ta bisa. “Ruman” ta un palabra cu Mike mester stima pasobra ta como ruman, Mike a bira colaborador den e prome gobierno di Aruba.

Ta tur caminda e dos rumannan tabata hunto. Den Conseho di Ministro: Mike cu su ruman. Dia y anochi: Mike cu su ruman.

Un asunto di family impresionante cu friends cu tabata haya trabou rapidamente den gobierno, a yuda stimula.

E asunto di friends a bira fastioso si na 2017, ora Gobierno a cambia.

Cantidad di Friends di Mike na careda. Hopi a keda sin traha mas te awe.

Nan a bay cu tur loke nan por a coy. Hasta computer cu e pober pagador di belasting a cumpra pa nan traha pa Mike.

Pero a logra haya loke friends di family Eman a saca for di oficina di Gobierno, cu nan a laga atras den tur destrui.

Awor nan kier bolbe drenta pasobra aparentemente mester cuminsa traha placa, sigur si bo ta hende di penthouse y ta biba den strea.

Mike y su coordinador di ayera den nan medio ambiente

Otro pareha forma pa e delicia di coordinador di Gobierno ta, Mike de Meza y Allan Howell. Politica a trata nan bon manera a wordo bisa.

Allan, cu tabata traha den staf di Polis, a mira e speransa berde di futuro den AVP cu el a join na 2013. E pober lo no tabata sa cu na 2013 ya AVP a afecta salud di Florin seriamente y cu el a yega poco lat.

Pero el a bira coordinador di Mike de Meza, e genio cu a bay cera acuerdo cu Nicolas Maduro y laga Aruba …..ay que tristeza. Pa colmo su bon amigo Nelson Martinez a muri den prizon y autoridad internacional a detene algun di esnan cu a resta.

Awe Allan no ta coordinador mas pero mester coordina palabranan di splicacion entorno e placa di fraccion di POR, cu ta bou investigacion cu Allan como sospechoso.

Pero si e bay yora cerca Mike de Meza, sigur tin comprension pasobra Benny Sevinger ta candidato/detenido mientras cu e Rapport di Refineria ta papia di Mike de Meza como un fantasma cu ta presente segun informacion den telefon pero riba papel lo no ta presente. Algo complica.

Grow Up Before and After den debate

E prome debate di Camara di Comercio tabata manera awa cu no kier a bira ijs. Pero e segundo debate si a bira interesante.

E mucha Mike a demostra cu e no ta wega. Na cierto momento a parce cu e ta fada y bay exigi Ensure prome cu e sigui.

Mike a lubida mes den ki tempo e ta biba loke naturalmente por ta resultado di bay sconde y no mira sikiera kico ta pasa.

Mike cu a mata forsa di Aruba dor di deshaci di mita BBO awor kier bay negocia cu Hulanda, cu a pone bay sconde den Fort Zoutman. Na debate el a bay confronta Evelyn Wever-Croes , cu “after” Mike a pone orden den e bomboshi financiero cu el a hereda y a logra yega na un Acuerdo cu Hulanda.

Suspenso grandi tin na Aruba ora e mucha Mike a declara cu e ta bay renegocia cu Hulanda. Ya hendenan a cuminsa reserva luga na Playa pa ora Mike bay sconde den Fort Zoutman atrobe, nan por bay goza di e show di muri di hamber di Mike.

Kico a pasa cu e tereno cu Selene di AVP a pidi Evelyn?

Selene, e dama di microfon cu ta basha abou ora AVP bay halto, debe nos un informacion prome cu Dia di Eleccion.

Kico a pasa cu e tereno cu el a pidi Evelyn?

Ta bon si pa Selene tene cuenta cu e mester informa su mes bon riba ley si e no kier haya su mes den problema. Como politico hende mester sa algo di ley.

Y ley ta bisa cu un persona cu provoca algo cu ta malo, ta faya cu ley. Pesey nos a puntra pakico el a bay pidi Evelyn tereno y kico lo a pasa si Evelyn a duna Selene tereno. Pues autoridad por pensa cu Selene a bay crea un occasion pa algo cu no ta permiti sosode.

Autoridad por sinti holor desagradabel.

Atardi den Penthouse…..dushi….pa e grupo elitario cu no ta traha pero tin penthouse…..