Contrario na cierto noticiero no tin nada dicidi cu Sint Aloysius School tin cu abandona edificio VAD

ORANJESTAD (AAN) – Cabesante di Sint Aloysius School, Meneer Vladimir de Cuba, a yama un conferencia di prensa,

primordialmente relaciona cu un rumor cu a core siman pasa, via un noticiero cu a laga mayornan cu a scuche, basta preocupa.

Meneer Cuba a duna di conoce cu mayornan a cuminza yama y acerca scol hopi preocupa, y cu tur nan derecho pasobra den e noticiero nan a anuncia cu e aña aki, entrante 1 di October, Sint Aloysius Scol lo mester desaloha VAD, cu ta e edificio cu scol ta ocupando awor, y bay bek na e edificio na Noord.

De Cuba a comenta cu e noticiero a papia di un “face-lifting” chikito cu e edificio na Noord lo haya pa scol bolbe drenta.

El a tuma contacto cu SKOA, y ta asina cu enberdad e Stichting a ricibi un carta tocante esaki, pero ainda e proceso pa confirma esaki y wak kico ta otro posible solucion ta andando. Kiermen, awo e proceso ta cuminza cana y no ta asina cu ta completamente determina cu e scol mester abandona e edificio actual.

Meneer de Cuba ta lamenta hopi cu un noticiero ta haci mal uso di cierto informacion, pasobra ni Sint Aloysius School, ni Maria Dependance, ni Bonifacius College, cu ta habita e edificio VAD, tabata na haltura di dicho carta.

De Cuba ta kere cu ta via cierto canalnan e noticieron concerni ta haya su noticianan, anto nan ta trece confusion innecesario, na e momentonan aki, cerca e mayornan.

Segun de Cuba, ta momento cu e tipo di noticieronan aki nan mester scan nan un tiki miho y duna nan un “estate quieto”, pasobra  no por ta asina cu nan ta coi noticia, bruha tera, manera nan ta kere ta bon y kere cu nada ta pasa  cu nan.

E cabesante a señala cu no ta prome biaha cu e noticiero ey ta mete cu Sint Aloysius School of cu su persona, y mester tin caminda pa bisa “ta basta” pasobra nan ta baha e calidad di otro noticieronan y reporteronan na Aruba, pasobra loke nan ta trece no ta noticia, sino redashi, pa bise bon cla! Asina Meneer de Cuba a expresa.