El a haci un oferta absurdo y no realistico: - ORANJESTAD (AAN) – Meneer Vladimir de Cuba, Cabesante di Sint Aloysius School,
a señala cu e edificio di e scol aki tin tres aña para y abandona, y awo ta mas deteriora pasobra e muchanan cu a vandaliza e edificio aki, den e tres añanan aki a vandalize hopi mas pisa.
De Cuba a señala cu si ta pensando riba un face- lifting chikito mes, e no ta realistico y e kier bisa esaki bon cla na e mandatario (minister di enseñanza). E no por ta realistico y no por duna e personal di Sint Aloysius, e alumnonan y nan mayornan di Noord, un bofta asina, den nan cara.
No por duna e edificio un tiki verf, drecha un par di porta, y manda e scol bay bek eyden. El a subraya cu si ta asina mes nan kier manda scol bek, esey ta inhumano y e lo entrega keho unda cu ta pa evita esey.
De Cuba a menciona cu nunca Sint Aloysius School tabata tin airco. Den temporada di Augustus te November, e calor cu ta haci eyden ta insoportable pa e personal y e alumnonan. No ta nada agradable pa duna les ni tuma les, den e ambiente aki.
De Cuba a splica cu e tin prueba di esaki con ora nan ta tuma temperatura den e klasnan, ya pa 9.30 or di mainta si pafo ta 32 grado anto e gevoelsmat ta 38 grado, pues ta mas cayente cu curpa di un hende. “Anto boso ta expect cu nos alumnonan por siña na un manera optimal asina ey?” Meneer de Cuba a subraya.
“Mi no ta bisa cu airco ta garantiza resultadonan bon so. E no ta esey so, pero e ta yuda si na mantene nos muchanan cu por ta mas trankil, pasobra ken por sinta, concentra y traha un toots den un calor asina. Ken por?” Meneer de Cuba a puntra.
Meneer de Cuba a expresa cu algo ta duel’e ta ora di drenta un klas y wak e muchanan nan sudor ta core, manera ta den gym nan ta, y e ora ey no ta ni diez or di mainta: pues, corda ora ta 10 or y mey, corda 1 or. “Anto bo exigi pa nos muchanan concentra y pa nos duna enseñanza di calidad?” Meneer de Cuba a reitera.
“Mi ta pidi encarecidamente na e Minister encarga cu enseñanza, pa recapacita riba e accion cu e kier bay tuma akinan, pasobra ta inhusto y inhumano, pa saca nos di aki y pone nos den un estado cu no ta optimal pa nos muchanan, pa nan siña”, Vladimir de Cuba a subraya.
De Cuba sa cu den pasado, e Minister a vocifera cu el a yega di ofrece Sint Aloysius un lugar hopi miho pa nan bay pasobra supuestamente, esun di Noord no tabata optimo of ideal pa e scol ta aden. No obstante e cabesante a rectifica esaki, di e siguiente manera: “Ningun biaha Minister a acerca mi y ofrece mi ningun edificio di miho calidad, pa nos por bay aden!”, e cabesante a acentua. El a referi si, na un oferta absurdo y no realizable: “Locual el a ofrece mi ta pa nos bay bek den un parti di e hala na parti pazuid di Sint Aloysius na Noord, y un parti pa uza Santa Anna School, parti merdia”, Meneer de Cuba a subraya.
De Cuba ta punta con esaki por ta ideal? St. Anna School tin un cantidad grandi di alumno tambe, y nan tambe tin derecho di haci uso di nan edificio, merdia. E maestronan aki tambe tin cu planifica nan les y prepara pa e siguiente dia. “Anto bo kier pa nos mes core cune pa hinca 236 alumno di Sint Aloysius den St. Anna? Imposible, toch? E no ta realistico” Cabesante Vladimir de Cuba a remarca.
Mas di e conferencia di prensa aki den otro articulo.
