Fondo di Monumento preocupa cu situacion na Rancho

*Principalmente e fornu di kalki

*Tin hende cu casi ta biba eynan 

ORANJESTAD (AAN)—Anne Witsenburg, Directora di Stichting Fondo di Monumento Aruba, den entrevista cu Matutino DIARIO a declara cu semper nan ta hopi preocupa cu e situacion na Rancho, principalmente rond di e fornu di kalki.

“Pa añanan largo nos a ripara cu tin hende cu ta casi biba eynan, loke pa nos ta un problema social hopi tristo; e no ta scoge pa ta adicto of pa biba eynan, pero e ta causa hopi molester pa nos, pa nos monumentonan. Enberdad, nos a inverti den nos monumentonan pa nan restauracion. Esaki ta un monumento chikito, pero e merece su restauracion y aworaki nos ta preparando pa haci mantencion den e monumento ey, pues no kier pa e keda bon pa futuro generacion”, señora Witsenburg a señala.

El a subraya cu e no ta un problema di e monumento sino mas tanto un problema social.

Señora Witsengurg a splica ademas, cu e leynan cu ta proteha Aruba su monumentonan ta pa proteha e historia, no e inversion. “Pero e ley ta bisa, ora bo ta haci daño na un monumento, bo por haya un boet of un castigo, pero e problema ta mas tanto cu e hendenan aki nos no por pone nan responsabel. Den pasado tabata tin limpiezanan door di Stichting Rancho; nos a haci limpi, Stichting Rancho riba su mes, y otro partnernan tambe a haci limpi, pero e hendenan ta bin bek”, el a señala.

Witsenburg a agrega cu “ora un hende ta haci daño concientemente na un monumento, e ta bashe abao, of kibra parto di dje, na mi opinion nan por wordo poni responsabel pa cu esaki, pero pa hende cu no tin un otro caminda pa bay, y nan ta urina y haci tur cos eynan pasobra no tin cas, no tin baño pa uza, con bo ta pone nan responsabel?”, señora Anne Witsenburg, Director di Fondo di Monumento, a conclui.