Resistencia na Aruba: Rebelionnan di Catibo y Camino pa Abolicion

Charla na conmemoracion di Dia di Tula

*Consecuencia y abolicion di sclavitud 

ORANJESTAD (AAN): Resistencia contra sclavitud no tabata limita solamente na islanan grandi den Caribe. Aruba mes tambe a conoce momentonan di rebelion y oposicion, cu ta mustra cu e deseo pa libertad a kima fuerte den curason di catibo.

For di asesinato di shon Pieter Lampe na Vader Piet te na actonan balente di Virginia Dementricia, historia cu ta testigua e lucha constante pa dignidad humano.

 Na siglo XVIII y XIX, nombernan manera Thomas y Thico a simbolisa un spiritu di resistencia cu, aunke castiga duramente, a prepara caminda pa eventual abolicion di sclavitud na 1863.

Ramon Todd Dandaré Mag. Ling durante e charla presenta na Archivo Nacional di Aruba dia 16 di augustus 2025, na conmemoracion di Dia di Tula, 230 aña despues di su rebelion na Corsou el a amplia riba e tema aki. 

Resistencia na Aruba

Resistencia di catibo a existi na Aruba tambe. Na 1750 tres catibo rebelde a asesina ruman muhe di Commandeur Nieuwkerk, yiu di e señora y dos catibo muhe. Despues di un buskeda, a ehecuta e fugitivonan sin niun misericordia. E huida mas bieu conoci di un catibo priva tabata esun di Thomas na 1765. E tabata propiedad di e prome colonista di Aruba, Mozes Maduro. Na 1829 un catibo yama Johannes a asesina su shon, Pieter Lampe, na e punta pariba di nos isla, un luga cu for di e tempo ey ta conoci como Vader Piet. Tambe e catibo Virginia Dementricia, naci na 1842, ta masha conoci pa su actonan di rebeldia contra su shonnan. 

Thico

Particularmente den e aña revolucionario 1795 resistencia a lanta bou di e catibonan den henter Caribe. Na juni 1795, prome cu lantamento di Tula na Corsou a estaya, e mestisonan na Noord a resisti contra e abuso di poder di nan Capitan. Na september e catibonan preto di Aruba tambe a protesta contra continuacion di sclavitud. Posiblemente siguiendo e ehempel di Tula, e catibo di gobierno Thico a surgi como un luchado pa libertad.

E tabata vocero di aproximadamente trinta catibo preto. Commandeur Specht a skirbi di dje: ‘Tin un Neger Thico, cu ta pertenece na gobierno y aya ta na sirbishi di Commandeur, cu a expresa su mes masha tribi y onbescop, bisando cu e no tabata desea di sirbi mas, sino cu e tabata liber.’ Mesora a detene Thico y nan a traslad’e pa Corsou. Aya, despues di varios luna cera y ‘di a mustra remordemento’, a resulta cu no por a bend’e mas. Djey nan a pon’e traha como catibo cargado na Fort Amsterdam. 

Consecuencia y abolicion di sclavitud

Despues e resistencia contra sclavitud na Aruba no a conduci na asesinato of lantamento di catibo. Sinembargo, e cantidad di huida si a aumenta. Catibo tabata huy bay Tera Firme. Nueva Granada (Colombia) tabata e refugio mas popular. Venezuela tabatin un tratado di extradicion cu e Hulandesnan, cual tabata conduci na regreso di e fugitivonan.

Despues di e huida exitoso di tres catibo na 1817 a pasa legislacion cu ta prohibi e doñonan di boto di laga nan boto anochi den awa. Entre otro door di e lucha tenaz di e catibonan Africano pa libertad durante casi 400 aña, e abolicionistanan Ingles a logra abolicion di comercio di catibo transatlantico (Maafa) na 1808.

Comercio di catibo a sigui denter di e islanan di Caribe, pero por mira esey como un anticipacion di mas emancipacion.

Oficialmente Aruba y Boneiro por a importa catibo solamente for di Corsou. Na 1818 a prohibi e comercio ey tambe. A aboli sclavitud mes na e colonianan Hulandes apenas na 1863. E ultimo pais na America cu a aboli sclavitud transatlantico ta Brasil, na 1888.