Segun Edward Maduro, Presidente:
*Den sentido di haya un solucion
ORANJESTAD (AAN) – Lider sindical di SADA (Sindicato di Aduana), Edward Maduro, a reacciona riba e declaracion di Minister Geoffrey Wever, tocante e plannan cu e tin pa Departamento di Aduana.
Den entrevista cu DIARIO, Maduro a cuminza pa bisa cu den tur seccion di Aduana tin tekort di personal y esaki no ta un secreto. Den tur dienst nan tin reto di draai cu poco hende, y hasta tin cu nan ta traha 24 ora, e siete dianan di siman, haciendo tres warda.
Na Aeropuerto por ehemplo, no tin tres warda cu ta traha marduga, pero si tin tres warda desde 6’or di mainta te 12’or di anochi, tambe durante e siete dianan di siman. Kiermen, den tur seccion falta empleado, y no solamente den esun di container.
Maduro a remarca cu esaki no ta di awo pero di hopi aña, y sigur diez aña caba.
“Manera bo ta wak cu ora tin un hende cu ta maneha e dienst cu no tin e vision, no tin e capacidad, e no por pone e presion riba e minister, bise si e no por pone hende pa traha, no por pone placa disponible pa busca hende pa traha, e comercio ta bay sufri”, Presidente di SADA, Edward Maduro a señala.
El a comenta cu e sindicato a bisa esaki na e Minister actual tambe. Nan a reuni cuater biaha cu ne, pero te aworaki nan no a wak un movecion concreto den sentido cu e ta move riba locual e sindicato a bise, sea pa tuma un decision of trece e partidonan hunto, pa wak enberdad unda e zapato ta preta.
“Kiermen, esey ta e problema cu nos tin den dienst, e no ta un secreto; mescos cu polis, imigracion y Brandweer tin tekort, y tur departamento ehecutivo cu ta traha pa gobierno tin tekort, pasobra e no ta facil enberdad, pero no por sinta man cruza anto warda te ora un of dos hende kier bin drenta den e dienst di Aduana, Polis, Imigracion etc. Abo tin cu haci, sea busca manera di cuminza motiva e mucha , den scol basico caba, pa nos haya hende pasobra tur e entidadnan aki tin un challenge pa haya hende”, Edward Maduro a señala.
