Minister Geoffrey Wever
ORANJESTAD (AAN): Den cuadro di e vision consistente di Gobierno pa revitalisa centro di Oranjestad, dialuna den oranan di mainta den presencia di Prome Minister Mike Eman, Minister Geoffrey Wever, descendientenan y famia di defunto John G. Eman, representantenan di Aruba Bank N.V., representantenan di Stichting Monumentenfonds, a tuma lugar e ceremonia oficial di firmamento y entrega di e edificio historico “John G. Eman” na Stichting Monumentenfonds Aruba. E acto ceremonial aki ta marca un paso importante pa e revitalisacion di Oranjestad.
E traspaso oficial aki ta sigui despues cu, na december 2024, Minister Wever a firma un intentieovereenkomst cu Aruba Bank N.V., Stichting Monumentenfonds Aruba y Nationaal Restauratiefonds. Un proceso largo, compleho y cu varios desafio a sigui, pero cu e esfuerso a logra yega na e acto di traspaso.
Durante e ceremonia, Aruba Bank N.V. ta firma e acuerdo pa traspasa oficialmente e edificio na Stichting Monumentenfonds Aruba, permitiendo cu e fase di restauracion y renobacion por cuminsa formalmente. E paso aki ta esencial pa prepara e edificio pa ubica e Centraal Bureau voor de Statistiek (CBS) y e Sociaal Economische Raad (SER).
Pa logra e proyecto aki, Stichting Monumentenfonds Aruba a logra un financiamento cu condicionnan favorabel via Nationaal Restauratiefonds, y Gobierno AVP-Futuro a percura pa un subsidio di Afl. 412.000, pa haci e transaccion aki posibel. E subsidio aki a wordo aproba den Parlamento door di e parlamentarionan cu ta sostene Gabinete AVP-Futuro y formalisa via Landsbesluit firma door di Minister-Presidente Mike Eman y Minister di Finansa Geoffrey Wever.
E edificio emblematico “John G. Eman”, situa na Caya G.F. Betico Croes, lo wordo restaura cu respet pa su balor historico y arkitectonico, y lo wordo transforma den un edificio multifuncional. E plan ta encera e ubicacion di e departamentonan Centraal Bureau voor de Statistiek y Sociaal Economische Raad, un apartamento riba e promer piso y un espacio comercial pa horeca cu terasa, contribuyendo asina na mas actividad, atractivo y dinamica urbano den Caya G.F. “Betico” Croes.
E restauracion y herbestemming di e edificio “John G. Eman” ta forma parti integral di e strategia mas amplio di Gobierno AVP-Futuro pa trece bida bek den centro di Oranjestad. Minister Geoffrey Wever ta impulsa un enfoke strategico caminda cu departamentonan di gobierno ta wordo ubica den edificionan historico, generando presencia diario di hende den centro di Oranjestad.
Minister Geoffrey Wever ta gradici Aruba Bank N.V., Stichting Monumentenfonds Aruba, specialmente Señora Anne Witsenburg, Nationaal Restauratiefonds y Gabinete AVP-Futuro pa nan colaboracion estrecho y compromiso comparti, y ta remarca cu e entrega oficial di awe ta un ehempel concreto di con cooperacion publico-priva por produci resultado concreto pa comunidad di Aruba.
Tambe ta felicita e descendientenan di John G. Eman cu e momento bunita aki. John G. Eman y e Aruba Bank cu e a funda tabata instrumental pa e desaroyo di Aruba su economia, financiando hopi empresa local y ciudadano pa por a yega na nan propio cas. Un visionario cu impact real, cu awe ta bira parti di Aruba su patrimonio nacional.
