Hopi gozo cu Paranda Nacional di Dande pasando rond Aruba

ORANJESTAD (AAN): Riba Diadomingo a cuminza cu e asina yama ‘Paranda Nacional di Dande’ di Edjean Semeleer,

y esaki ta un proyecto unda e grupo di Dande ta core riba un trailer cu speaker, y ta pasa bishita diferente area.

   E prome dia nan a pasa atardi na Bushiri Complex, como tambe Centro Deportivo Frans Figaroa, a pasa den area di Hotelnan High-Rise, y tambe a para banda di Kapel Huan Pablo II na Tanki Leendert.

   Riba Dialuna nan a pasa na Mabon Kavel, a pasa na Carnival Village & Entertainment Center, a para banda di Mauchi’s Smoothies na Savaneta, a pasa den parkinglot di Club Estrella, y a para finalmente na rotonde di Paradera.

   Awe Diamars e lo pasa 4:00 pm na Aeropuerto, pa 6:00 pm e lo ta na Centro di Bario y Deporte Dakota, pa 7:00 pm lo ta na Madiki Kavel, y pa 8:00 pm lo ta na Irausquin Plein dilanti sucursal di Setar.

   Esaki a bira posibel danki na tur esnan cu a colabora financieramente pa haci esaki posibel: Aruba Tourism Authority, Unoca Aruba, Aeropuerto Reina Beatrix, Setar NV, VNO - Vertegenwoordiging van Nederland in Oranjestad, Departamento Di Cultura Aruba y Click Print Aruba.

   Paranda Nacional di Dande di Edjean Semeleer cu colaboracion di Minister President Mike Eman den bario riba prome dia a pasa bishita Bushiri Complex.  Aki a canta Dande pa grandi y chikito.  Sigur nan ta orguyoso di brinda sosten na Cultura di Aruba. Ban duna caluroso abraso na Paranda Nacional di Dande 2025, cu ta den recorido na diferente parti di Aruba. E bunita tradicion cultural aki ta refleha ken nos ta como pueblo, ta realsa nos herencia, musica y sentido di comunidad.

   Ta desea e organizador, musico y participantenan hopi exito pa e continuacion di e celebracion.