Finalisando pa lanta e Monumento di e prome avion na Aruba

E siman aki e lo wordo inaugura

ORANJESTAD (AAN): Manera cu DIARIO a trece caba dilanti recientemente, Aruba Airport Authority (AAA) a anuncia cu nan lo traha conhuntamente cu e artista Gilbert Senchi, pa crea un piesa di arte publico memorabel na honor di e di 100 aniversario di aviacion na Aruba. 

   Gilbert Senchi di Artopia y AAA a cera acuerdo artistico y creativo pa e diseño ideal di un escultura cu lo captura e momento memorabel aki. E escultura lo refleha e evolucion di aviacion durante su 100 aña di historia y lo inclui un aspecto historico, actual y futuristico. Den e bunita obra di arte aki lo refleha e aspecto dinamico di e industria di aviacion. E  lo ta un obra di arte publico pa tur local y bishitante por aprecia.

  Mientras tanto, e obra aki cu ta birando caba un ‘monumento’, lo bay wordo poni na un lugar cu tambe ta forma parti di e  historia tocante di e escultura cu lo ta diseña y produci pa Artopia cu aporte financiero di AAA.   Riba e potret por mira e artista ta haciendo e toque final di e obra, cu ta un imitacion di  e avion mes cu a bira esun prome cu a ateriza riba lama na Paardenbaai.  E pedestal tambe a yega den container.

   Nan lo bay inaugura esaki  riba 18 di augustus 2023. Riba e fecha aki ta celebra oficialmente e 100 aña di aviacion na Aruba, despues cu e prome avion a baha na aña 1923, den lama na Paardenbaai.

   Un monumento cu ta simbolisa e prome avion cu 100 aña pasa a aterisa den Paardenbaai na Aruba, a ser entrega na Aruba.