Amelia Elskamp corona como Miss Youth Aruba 2023

Representante di Oranjestad a luci riba escenario

ORANJESTAD (AAN): Diasabra anochi den Renaissance Conference Center a tuma lugar e certamen di Miss Youth Aruba 2023.  Un anochi caminda e ganadora di 2021, esta Stacey van Gaalen a baha su corona pa un candidata nobo cu ta bay carga e nomber di Aruba tanto local como internacional.

   Un total di 10 candidata, cada uno cu hopi potencial a subi escenario, y di trempan por a nota cu ta un trabao dificil pa e cuerpo extenso di hurado e anochi ey.  Como maestronan di ceremonia a fungi Jahe Bikker y Alexia Chin, y ambos a haci un fenomenal trabao!

   E anochi a bay combina cu show di baile, cantamento y publico tabata hopi anima henter e anochi.

   E resultado a bira conoci te despues di 12’or di mey anochi.  Un di e candidatanan cu apenas 15 aña di edad a duna contestanan asina extenso y al caso, na final a bira esun cu a bya cu e corona!  Pues e ganadora a bira Amelia Elskamp representando Oranjestad y sosteni pa P’thierre Beauty Makeup.  Amelia a bay cu e premio tambe di Miss Youth Disciplina, y Miss Youth Project.

   Prome finalista a bira Kellen Venero representando San Nicolas.  El a bay cu premio tambe di Miss Fotogenica.

   Di dos finalista a bira Nairobi Richardson representando Dakota.  El a bay cu e premio tambe di Best Youth Body, y tambe Best Youth Makeup.

   Di tres finalista a bira Mary-Jane Kransen representando Brazil.

   Di cuatro finalista a bira Ivangeline Matos di Pos Chiquito, kende a gana premio tambe di Miss Popular.

   Tur e candidatanan a luci nan trahe di gala cu ta un creacion di e diseñador local Jairo Erasmus.

   Amelia Elskamp lo ta bay prepara rapido, como cu aki 1 luna ya caba e lo bay representa Aruba na e certamen di Miss Teen Mundial, cu a muda for di El Salvador y awor lo ser teni na Curaçao.