Despues di a keda postpone na Juni:
ORANJESTAD (AAN) – Den un conferencia di prensa reciente, convoca pa Ferdinand Franca (Docente, actor y productor di teatro), a anuncia cu e Musical “Mi ta un artista”, cu a keda postpone na Juni ultimo, lo bay door, den Cas di Cultura.
Franca a reitera cu e Musical a wordo postpone pa diferente motivo y esun principal ta cu e actornan mes a bisa cu nan kier duna e publico, algo mas, pues e miho version di nan mes, cu calidad hopi halto.
Ferdinand a indica cu door cu nan a presenta aña pasa e Musical “Planta awe, cosecha mañan” cu a logra un exito rotundo, su alumnonan a expresa cu nan no kier presenta algo “con cu ta” pero di mesun nivel of superior.
“Y esey ta un tema di e musical. Pa e muchanan lucha pa nan soñonan, pa nan rindi y sigui alcanza loke mas nan por y pesey nos a dicidi di pospone”, Ferdinand Franca a subraya.
El a anuncia e fechanan nobo cu ta Diabierna 1 di September anochi, di 7.30 or pa 10 or y Diadomingo 3 di 4’or pa 6’or y mey di atardi.
