Fin di maart por spera e resultado di e evaluacion di Standard & Poor's

Minister Maduro a reuni cu e compania di rating

ORANJESTAD (AAN)- Tur aña Minister Maduro ta reuni cu ehecutivonan di Standard & Poor's  (S&P) riba e evaluacion di nos Pais su situacion financiero y economico. Siman pasa a toca turno na e mandatario pa reuni cu S&P, despues cu S&P a reuni virtualmente cu diferente departamento di Gobierno y instancia, pa asina por haya un bista con Aruba ta para financieramente y economicamente.

            Durante e reunion e team di Departamento di Finansa cu ta asesora Minister Maduro, a brinda un presentacion financiero y economico na S&P. Minister Maduro a contesta preguntanan cu S&P tabata tin riba, entre otro, e reforma fiscal, Presupuesto 2022, relacion cu Hulanda, reformanan den e Landspakket y aceso na finansa.

            Mester remarca cu 'a prima vista', S&P ta satisfecho con Aruba ta trahando pa sali di e situacion di e pandemia y e hecho cu Aruba ta conta cu un structura cla di yudansa fo'i Hulanda, ta brinda un siguransa den e temponan di inseguridad cu mundo ta aden. Esaki sigur ta positivo pa e resultado di e evaluacion di Aruba.

            Minister Maduro ta gradici tur stakeholders pa nan input balioso pa e evaluacion di Aruba y ta gradici e team di S&P pa nan trabou dedica y nan bon cooperacion di semper pa Aruba. Fin di maart por spera e resultado di e evaluacion.