Filomena College MAVO cu 93% di graduado pa 2021

ORANJESTAD (AAN): Recientemente den House of Mosaïc na Eagle, a tuma luga e graduacion y entrega di diploma di Filomena College Mavo na San Nicolas.

            E anochi a cuminsa cu e himno di Aruba y a ser bendiciona cu e oracion di bendicion pa ex-maestro Lila Richardson. E bunita anochi bao di strea, tabata bao guia di juffrouw Nicole Leslie y tabata conduci  pa meneer Addonsito Croes. Tambe directora di SKOA, señora Anuesca Baly tabata presente y a dirigi palabra di felicitacion  y animacion na e graduadonan.

            Pa director Raquel Lampe, e resultado di 93% di graduado pa 2021, ta yena e team di Filomena Mavo cu orguyo grandi.  Den un aña dificil nos muchanan a haci nan best y e resultado ta exitoso.

            Josie Boekhoudt a resulta e miho graduado di 2021. Josie a gradua cu un profiel cu tabata tin cifranan di 8 y 9 so. Josie a ricibi su diploma algun dia prome cu graduacion.

            Henter team di Filomena College Mavo ta felicita y desea tur graduado hopi exito cu nan futuro estudio.