ORANJESTAD (AAN): Den fin di siman cu a pasa, Formador Evelyn Wever-Croes hunto cu futuro partner di coalicion, a reuni cu stakeholders, incluyendo Armand Hessels di Stichting Deugdelijk Bestuur.
E Fundacion a indica cu semper nan ta pro pa duna tur instancia mas autonomia, y asina ta haci e operacion di Gobierno mas chikito. Asina ta saca e influencia di Gobierno hopi mas for di departamentonan.
Hessels a indica cu nunca e tabata bao impresion cu Ministerio Publico na Aruba tabata bao influencia politico. El a yega di papia cu varios Procurador General den ultimo añanan (excepto e ultimo), y tur a subraya y sigur’e cu no tabatin influencia politico ni bao di Gobierno di AVP ni bao di MEP.
Comunidad mester duna un presion extra pa entidadnan den Gobierno manera Ministerio Publico y tambe DIMP tin di bira mas autonomo, cu ta wordo saca di influencia politico y bira asina mas independiente. E ora ey e maneho lo por bira mas comercial, tumando hopi mas na cuenta e ‘gasto y entrada’ pa hiba maneho mas sano.
Hessels a bisa, cu e momento a yega pa pueblo cuminza saca for di nan cabez, e pensamento eroneo cu “Tur nos problemanan tin di wordo soluciona door di Gobierno”.
E ciudadano tin di cuminza asumi mas responsabilidad. Un Gobierno ta necesario y importante pa lineanan grandi di contacto cu exterior y pa realmente maneha e pais. Pero e maneho interno por wordo haci hopi bon door di e entidadnan. Gobierno mester ta djis un instancia pa controla y vigila tur cos y wak si tur cos ta bay segun regla. Pasobra tur esey no a tuma lugar suficientemente ultimo decadanan na Aruba.
Fundacion a trece dilanti tambe na Formador riba e asunto di drecha transparencia pa pueblo tambe tin mihor control. Aki el a menciona con Parlamento di Aruba mes tin un website riba Internet, pero sinembargo desde 2016 e no tin ningun update importante mas riba dje.
E concepto di transparencia mester cuminza cune! Y net na Parlamento unda hopi documentacion ta drenta, ta importante pa tur wordo archiva na forma digital pa asina pueblo por haya tur informacion necesario.
Tambe a menciona cu Ministerio Publico ta un instancia cu realmente ta depende pa hopi tempo di un tipo di secrecia tocante e desaroyo di nan investigacion, pasobra si Ministerio Publico lek net un tiki di mas di informacion, e por afecta un investigacion. Pues por compronde pakico nan ta ‘cera’ pa atende asuntonan sensitivo.
Segun Hessels, e por a tende Procurador General indica con den un solo investigacion di caso rond di un ex-Gobernante, nan a haya suficiente material pa nan por hiba dilanti Huez un total di 8 of 10 caso igual. Sinembargo nan dificultad grandi ta e cantidad di personal cu e preparacion adecua pa studia tur esaki.
Pesey e Fundacion a boga pa RST por ehemplo haya mas acceso, pasobra e sa cu na Aruba mes no tin suficiente hende cu e capacidad specifico ey. Pasobra un funcionario hudicial pa haci e tipo di investigacion asina, e mester ta un tipo di hurista, mester ta bon na altura di situacion financiero-economico. Ken tin bon hende den cuestion asina? Esey ta RST, cu e team Bestrijding Ondermijning.
Hessels ta lamenta cu Ministro demisionario actual (Bikker) a para haci dificil pa RST bin, y el a para entrada di ‘Bestrijding Ondermijning’. Ora Hessels a puntra pakico a stop nan di drenta Aruba? E contesta tabata: “Pasobra nos ta autonomo riba e tereno ey.”
Si Aruba ta autonomo, e ora percura pa bo tin hende. “Aruba mes tin hende?” “No!” E ora Gobierno a duna impresion cu bo kier evita di bin mas investigacion tambe riba bo propio comportamento.
Pesey ta importante pa comunidad compronde cu autonomia ta grandi, pero te ainda no tin e capacidad pa carg’e full. Y e sa cu Gobierno ta realizando esey, y tanten cu no tin tur e capacidad ey, lo tin di pidi yudanza di esnan cu por duna un man na esey.
Si Aruba ta considera corupcion y mal gobernacion como algo importante, lo tin di bay wak con pa trece esnan aden pa yuda e isla drecha e calidad di gobernacion. Hessels tin e impresion cu Gobierno ta serio den esaki y lo kier mehora e parti aki. E ta spera cu algo wordo haci.
