FCCA a presenta nan logo nobo

Prome Minister: “No por imagina un Aruba sin FCCA”

ORANJESTAD (AAN) – Diabierna atardi, a tuma lugar e develo di e logo nobo di FCCA, na Sabana Blanco, cu presencia di Minister Presidente, Evelyn Wever-Croes, ken a hiba palabra.

Wever-Croes a gradici e invitacion aki, den nomber di Gobierno di Aruba, en special di Minister di Finanzas y Cultura Xiomara Maduro, y di Minister di Economia Geoffrey Wever.

            Minister Presidente a indica cu despues di un trayectoria hopi largo cu a cuminza na aña 1979, door di e mando di e diputado e tempo ey Charo Kelly (dfm), e ta eynan pa ta testigo di un dia importante y significante pa e existencia di e Fundacion Cas pa Comunidad Aruba, conoci popularmente pa FCCA.

FCCA ta un fundacion estableci pa gobierno di Aruba, na principio do aña 1979, cu e obhetivo di resolve e scarcedad di vivienda social y ofrece un cas adecua na e famianan di Aruba, specialmente esnan di menos recurso economico.

            “Den e añanan cu a sigui FCCA a contribui grandemente na e meta aki, y awe un gran cantidad di famia por tin nan hogar. Si nos mira bek, mi  no ta kere cu nos por pensa riba un Aruba sin FCCA. Y pa esey, nos ta gradici na cada un di boso cu ta labora dia aden, dia afo, na FCCA. Y awe, e meta aki ta mas necesario cu nunca. Saliendo for di e pandemia mundial di Covid-19, despues nos a haya nos mes den e crisis di e guera di Ukraine, nos ta mira con necesario un Fundacion manera FCCA, ta”, Minister Presidente a expresa.

            E mandatario a elabora riba Aruba su recuperacion di turismo cu ta tumando lugar, cu aunke no ta na e nivel di prome cu pandemia e ta yegando eynan, mescos cu e recuperacion financiero-economico nos pais, cu e ta mira cu pa otro aña lo ta completamente recupera. E mandatario a destaca e importancia di e trabao di e personal di FCCA, unda tin hende tin hopi aña ta trahando, otronan un poco menos, y algun ta mas nobo. El a reitera su gratitud pa e trahadornan aki.

            Seguidamente, director di FCCA sra. July Wever a pasa dilanti, y despues di su discurso a devela e logo nobo, unda tur hende a pone su granito di santo. E logo aki tin autenticidad di FCCA den dje y tambe e futuro su dilanti. E idea tras di e logo aki ta un tehel autentico traha di Aruba di antes. Su colornan ta geel y blow y tambe tin representa un bloki solido, manera FCCA ta pa su clientenan. E colornan geel y blow tambe ta representa den e naturaleza di Aruba. E tin e kibrahacha, color geel y tambe diferente color blow scur y cla cu ta refleha Aruba su lama y su bunita cielo.

             Wever tambe a reitera cu Aruba no por sin FCCA y e tey pa yuda trece y traha casnan y hogar pa tur e famianan cu tin mester di dje.

            Seguidamente señora Wever, director di FCCA a haci e acto di develo di e logo nobo di e Fundacion Cas pa Comunidad Arubano.