A promove sesenta empleado na Aruba Marriott Resort & Casino

Ta ofrece un carera y no simplemente un trabao

ORANJESTAD (AAN): E aña aki, entre januari y juli, Aruba Marriott Resort & Stellaris Casino a promove 60 empleado, asina Reuella Reeberg, Human Resources Manager na Aruba Marriott Resort & Stellaris Casino, a indica. Ta trata aki di empleadonan trahando actualmente cu e resort y cu a dicidi di crece den nan carera, sea cu nan a bay otro departamento of avansa den posicion y responsabilidad.

            Na aña 2021, despues di pandemia, Aruba Marriott Resort & Stellaris Casino a promove no menos di 120 asociado. Pa aña 2022 ya nan a promove 60 empleado caba, pa cual nan ta celebra y laga pueblo di Aruba sa cu na Marriott no ta simplemente un trabao, sino un carera. Tin hopi oportunidad pa crece cu e compania. Entre e 60 empleadonan cu a avansa den nan carera, ta figura Ryan Rampersaud, Jason Bregita, Glenn Maduro y Sibella Jansen. Tur a cuminsa nan carera for di abou y cu awendia ta ocupa un posicion di ‘management’ of ehecutivo den e compania.

HOPI OPORTUNIDAD

            Ryan Rampersaud tabata un comerciante y na aña 2015 a dicidi di haci un cambio den su carera y a aplica na Marriott como Assistant Manager den Champions Restaurant. Cu Marriott el a siña tur procedura standard p’asina brinda tur huesped un super bon estadia n’e resort.

            Ryan a traha tres aña den e posicion aki. Despues el a sigui crece, a forma parti di e cambio cu tabatin na Ocean Club. Na 2021 a habri e posicion di Director of Performance Optimization, cu ta forma gran parti di operations manera front office, housekeeping, engineering, entre otro. El a aplica y a logra haya e posicion aki. Na 2022 a habri un otro posicion, Director of Operations, cu ta un posicion similiar, pero cu un tiki mas encargo y responsabilidad.

            Ryan a agrega cu Marriott ta un compania cu ta brinda hopi oportunidad. “Si abo kier crece y realmente bo gusta e industria di hospitality, aunke cu falta experiencia kisas y lo tin miedo di aplica pa un posicion, toch na momento cu yega na Marriott, nan ta yuda bo, guia bo y promove bo.” El a remarca cu Marriott ta manera un scol of un universidad. Bo ta siña masha hopi mes. Nan nunca ta laga bo bo so. Bo ta desaroya bo mes, haya curso y haci training p’asina eleva bo mes y crece den e funcion, como persona y cu e compania. 

DI SCOL PA E UNIVERSIDAD DI MARRIOTT

            Jason Bregita ta un di e empleadonan cu tambe a haya un promocion. Den su caso, el a bira Director of Finance. Pero su carera cu Marriott a cuminsa fo’i 2014, tempo cu e tabata studiante di Universidad di Aruba. Pa su ultimo aña, pa completa su educacion universitario, el a aplica na Marriott p’e core stage y a tuma un tempo pa caba su scriptie p’e por a gradua. Na 2015 el a bin bek como un Voyager, cual ta un programa cu tin pa management trainees y como graduado di universidad por a aplica pa un posicion asina. Jason a haci e programa aki pa un aña y mey y a siña loke e tabata por.

            Jason a keda siña y a bay pa tur reto. E tempo ey e tabata esun di mas jong y a tuma e reto aki cu hopi amor, trahando masha duro mes. Asina el a keda bay te cu na 2017 el a bira Senior Assistant Director of Finance n’e resort, incluyendo e casino. Na 2019 el a dicidi tuma un reto nobo, birando asia Financial Controller di Stellaris Casino, cu ta un mundo riba su mes, vooral control y risico.

Durante pandemia hopi cos a cambia, staff a bira menos y mester a tuma rol y responsabilidad adicional den e tempo ey. Marriott ta un hotel cu tin huesped fiel y tabatin suficiente forsa pa por a wanta e pandemia aki riba su mesun forsa. A sali fo’i dje meymey di 2021, biniendo bek cu forsa completo.

            Na cuminsando di 2022, Jason a haya e oportunidad pa bira Director of Finance di tanto Surf Club como Ocean Club, posicion cu e tin actualmente. Por ultimo el a comenta cu pa traha na un hotel manera Marriott, bo no mester tin miedo pa ta creativo. 

SEMPER SIGUI KERE DEN BO MES

            Glenn Maduro tin mas cu 15 aña trahando na Aruba Marriott Resort & Stellaris Casino. Cu paso di e añanan desde cu el a cuminsa na 2007, el a sigui crece. A cuminsa como Night Agent na e departamento At Your Service contestando telefon. Djey el a bira night auditor. For di eynan el a bira un Front Desk Agent y te cu awo, e tin cuater luna cu e posicion di Assistant Rooms Operations Manager. Glenn a splica cu pa traha den un hotel, bo mester stima e trabao, stima e guestnan. E no ta un trabao facil tur ora, pero mester keda positivo y trahando duro, ta logra. 

SOSTEN DI E LIDERNAN

            Sibella Jansen tin un trayectoria hopi impresionante den Marriott. Na 2013 el a mira e oportunidad pa drenta den accounting como Accounts Receivable Clerk, cual posicion el a bay p’e. El a mira hopi oportunidad pa siña hopi cos tempo cu el a cuminsa traha. Despues el a haya e promocion como supervisor den accounting, sigui pa Assistant Manager despues di dos aña. El a keda cu e mesun idea pa sigui crece y sigui siña mas cu e tabata por, implementando proceso nobo p’e por sigui avansa den Marriott, enfocando riba loke e gusta, cual ta accounting.

            Algun aña despues el a haya e promocion pa Junior Accountant, unda cu el a traha cu financials di ambos hotel. Hunto cu esey e tabata sigui mas curso. Den 2021 el a haya e promocion como Assistant Director of Finance, unda cu e ta responsabel p’e financials di tur tres propiedad hunto cu e Director of Finance y Complex Director of Finance.

            Sibella a splica cu mustrando interes den e trabao y semper trece idea dilanti, hunto cu su manager, a haya e push p’e por sigui bay p’e, cual e gusta masha hopi na Marriott. Semper tin e sosten di e lidernan pa bay dilanti. E ta sigui comenta cu si mustra e interes, si mustra cu kier y bringa duro p’e posicion, e ta sosode. Na Marriott nan ta purba di promove asociadonan local cu ta traha eynan. Hopi hende tin e impresion cu ta hende di afo tin e posicion halto, pero no t’asina. “Si bo mustra di bo parti cu bo por y pusha bay dilanti, e lo sosode pa bo tambe.”

Sibella ta conseha pa “Bay p’e. Semper purba algo diferente y nunca tene miedo pa haci esey. It can take you places cu nunca b’a pensa cu bo lo yega,” el a bisa na final. 

EDUCACION Y TRAINING

            Reuella Reeberg, Human Resources Manager na Aruba Marriott Resort & Stellaris Casino, a comenta cu na Marriott nan ta kere den desaroya e trahadonan. Ta provee nan hopi training y oportunidad pa siña tur dia. E ta un compania hopi dinamico den e industria hotelero y tur dia ta siña algo nobo. “Tur dia tin algo nobo cu ta pasando,” Reeberg a splica agregando cu ta duna e empleadonan e guia y e sosten cu nan tin mester pa nan yega unda nan kier yega.

            “Si bo ta contento unda cu bo ta, tambe ta bon. Y si bo ta un persona cu tin e animo cu kier sigui crece, tambe nos ta duna tur e guia, e training, e support system cu mester pa por yega unda bo kier yega,” Reeberg a bisa. 

TIN MAS OPORTUNIDAD PA TRABOU

            Ainda Marriott tin posicion habri y ta buscando varios persona pa por join e team. Si abo kier forma parti di e team di Marriott, subi riba nan website: www.marriott.com/careers, pone location Aruba y ta haya tur e posicionnan cu tin habri actualmente. Pa por join e famia di Marriott “no ta simplemente un trabao, E ta un carera”. Bo Por crece, desaroya bo carera y asina yega bo metanan.

            Por ultimo, Reeberg a bisa cu si tin cualkier persona cu por tin dificultad pa aplica online, por pasa libremente na oficina di Human ResourCes di Marriot entre 10:00 am te cu 3:00 fo’i dialuna pa diaranson y cu mil amor e profesionalnan lo yuda bo aplica.