Ecotech awor ta procesa taira den su planta na Barcadera

Miho maneho di desperdicio pa evita candela riba dump

ORANJESTAD (AAN): Manera ya ta conoci, entrante dialuna dia 22 di augustus, a dicidi cu Serlimar lo no acepta taira mas na e landfill na Parkietenbos. Ecotech Freezone ta tuma tur taira, ta procesa y despues pasa nan pa Carentra, cu ta recicla e material den bio-diesel. Di e forma aki ta evita taira riba dump, cu consecuencia cu ta cende candela, causa panico den vecindario y haci daño na medio ambiente.

   Edward Jimenez, gerente di operacion di Ecotech Freezone a splica cu e proceso ta cuminsa ora e cliente yama p’e servicio. Nan tin dos opcion, sea nan ta trece e taira Ecotech direct of busca un baki. Ta yena e baki pa despues hiba Ecotech pa procesa. Ta cobra a base di peso, pero cu ta calcula na mas o menos 3 florin pa taira, aunke ta depende cuanto taira y e peso final.

   Jimenez a conta cu despues ta saca e hero for di e taira, ta separa e material pa reciclahe. Despues ta corta e taira y prepar’e pa e siguiente proceso, den cual ta hiba e producto pa Carentra pa nan convirtie den azeta pa bay den biodiesel.

   Clientenan interesa pa deshaci di taira por tuma contacto cu Mr. Bucket na 5943757 of tambe por bay rib’e pagina di Facebook of website di Ecotech unda tin tur informacion pa contacto p’asina pidi p’e baki p’e tairanan. Tambe por pasa na nan oficina na Parkietenbos pa cualkier servicio.

   Ecotech ta existi desde aña 1985 y como tal ta un pionero den e industria aki. Na aña 2009 a crea Ecotech Freezone, cu un planta di separacion profesional y unico den Caribe. Desde cinco aña caba nan ta encarga pa procesa un gran parti di desperdicio na Aruba, tanto esunnan comercial como esunnan residencial. Ta haci esaki cu gran exito. Pero ta consciente cu ainda falta algun detaye pa por cera dump na Parkietenbos completamente…y un di nan ta procesamento di taira.

   EcoTech Freezone ta ofrece, mescos cu ta ofreciendo awo na Serlimar y tur otro compania cu ta piki sushi, sea comercial of residencial, cu nan tin un planta profesional y limpi cu ta acepta taira. No mester subi dump mas, cu tur e retonan cu e area tin pa e trucknan.