Fayecimento inespera di conocido Morris Figaroa di restaurantnan di Hooters y Benihana

ORANJESTAD (AAN): Diamars mainta, famia y diferente colega empresario y tambe trahadornan di Benihana Japanese Steakhouse como tambe Hooters Family Restaurant,

a keda den shock ora cu nan a haya sa cu nan tan admira gerente general, esta Morris Figaroa, a fayece inesperadamente.

   Nan a haye den cas na Palm Beach sin cu e ta duna señal vital mas.  Autoridad a yega, pero a mira cu no por a haci nada mas pe.  Finalmente ta Docter a yega y a constata morto di Morris Remigio Figaroa Jr., naci na Aruba dia 1 di October 1970, pues tin 50 aña di edad.  Tur cos ta mustra cu e lo ta un morto natural, causa door di un atake di curazon.

   Morris ta un persona cu semper di chikito a mustra gran interes pa bay den e mundo di Food & Beverage.  Pesey mes, den e sector di F&B e tin casi 35 aña di experiencia.

   Pa e companianan di Benihana Japanese Steakhouse y Hooters Family Restaurant e tin como 26 aña trahando y manehando na su estilo cu hopi dedicacion.

    Morris ta un persona cu ta hopi aprecia, hopi stima, y ta ser considera un di e personanan cu mas conoce e industria aki.  Su experticio riba maneho di personal, di e reglanan di cushina, reglanan di HACCP, seguridad di cuminda, y reglanan di labor, ta asombroso.

   Fuera di esey, lo mas importante ta cu Morris Figaroa ta un individuo kende tin un wowo skerpi riba teamwork pa logra e mihor resultado pa e negoshi, y toch e toque personal ta loke a pone resalta mas den memoria di tur hende.

   Na famia di Morris Figaroa, su coleganan, trahadornan, amigonan, y gerencia di e companianan, DIARIO ta extende su mas profundo palabra di condolencia.