FAVI ta resalta independencia y participacion den cuadro di Dia Internacional di Garoti Blanco

Karensa Wernet-Kelly di FAVI:

ORANJESTAD (AAN): Move cu independencia, siguridad y confiansa ta un derecho di cada persona. Den cuadro di Dia Internacional di Garoti Blanco, FAVI a pone enfasis riba e importancia di conscientisacion y respet den trafico, pero tambe riba e necesidad di crea mas oportunidad pa personanan cu un limitacion visual participa plenamente den comunidad. 

Como culminacion di Siman di Garoti Blanco, FAVI a sali riba caya cu un grupo di ciudadanonan di diferente edad cu un limitacion di bista. E actividad tabatin como meta pa trece conscientisacion publico tocante e significado di e garoti blanco, tanto como instrumento di orientacion y como simbolo di autonomia. 

Entre e participantenan tawatin un mucha cu a crusa caya cu e garoti blanco, simbolicamente representando e muchanan cu un limitacion visual cu ainda no a yega cerca FAVI. Su participacion tabata tambe un yamada na mayornan cu ainda no a tuma e paso pa busca orientacion pa nan yiu. 

Karensa Wernet-Kelly di FAVI a splica cu mayornan no tin cu warda riba un diagnostico pa acerca e fundacion. For di e momento cu tin un duda tocante bista di nan yiu, nan por acudi na FAVI pa orientacion. El a encurasha mayornan pa busca sosten desde cu nan nota cu algo por ta afecta bista di nan yiunan. 

Durante e actividad, FAVI a conta cu cooperacion di usuarionan di trafico. Wernet-Kelly a subraya cu ta esencial pa publico reconoce e garoti blanco y adapta nan comportacion ora un persona cu un limitacion visual ta crusa caya. E atencion y precaucion aki ta necesario tanto pa adultonan como pa muchanan, pa nan por move cu mas siguridad. 

Segun Wernet-Kelly, FAVI ta observa un aumento den e cantidad di personanan cu problema of limitacion di bista, incluyendo personanan di edad cada bes mas hoben. Aunke mas ciudadano ta busca ayudo sin warda mucho tempo, e fundacion ta sigui encurasha esunnan cu ta enfrenta dificultad cu nan bista pa acerca FAVI mas pronto y participa activamente den e sosten cu ta disponibel. 

El a destaca tambe cu e necesidadnan y aspiracionnan di e grupo aki a cambia. Caminda antes e enfasis tabata principalmente riba participa den actividadnan na FAVI y despues regresa cas, awor e ciudadanonan cu limitacion of problema cu bista kier bay scol, sigui un estudio y traha. 

E mensahe ta cu personanan cu un limitacion visual kier oportunidad pa desaroya nan talento y contribui na sociedad. Un comunidad inclusivo ta esun cu ta reconoce e ambicionnan aki y crea e condicionnan pa cada persona por participa cu autonomia, dignidad y igualdad di oportunidad.