Fase 2 yama 'Accion pa coreccion' a duna su prome paso hunto cu Fundacion pa Bon Gobernacion y HOPE

Armand Hessels, Presidente di SDBA:

ORANJESTAD (AAN) — Armand Hessels, presidente di Stichting Deugdelijk Bestuur Aruba (SDBA), den un entrevista a duna di conoce cu e prome fase di e Rapport NIS (Sistema di Integridad Nacional) a pasa caba, y esaki a wordo publica na April ultimo.

E aspectonan di investigacion y concientizacion pa SDBA a caba, y awor ta bay den e di dos fase cu yama “Accion pa Coreccion” y diamars a duna e prome paso.

Hessels a subraya cu no ta SDBA so ta envolvi, pero hunto cu Fundacion pa Bon Gobernacion bao liderazgo di Mieke de Droog, cu SDBA tin hopi aña caba colaborando hunto, y Fundacion Hope, bao liderazgo di Lissette Malmberg, cu tambe tin como meta principal fortifica e sentido di ciudadania, pa hende bira conciente di nan responsabilidad pa cu nos comunidad.

“Den nos mes nos a organiza e evento aki, unda tin representante di organizacion. Nos no a hacie habri pa publico, pasobra esaki tin como meta pa e organizacionnan traha hopi mas conciente tocante nan responsabilidad pa e bienestar di comunidad”.

“Pesey tambe, nos tin representante di e gremio comercial, sindical, gobierno, y varios instituto NGO, etc. Esaki ta apenas un principio di locual nos a haya den e rapport calidad; e recomendacionnan como punto di salida, pasobra esaki lo ta prome biaha cu un rapport di investigacion, tocante funcionamento di gobernacion, no ta disparce den un lachi, si no ta wordo uza door di comunidad pa bin cu un cambio pa mehoracion. Y pesey nos a yame tambe ‘Accion pa Coreccion’, pasobra tin hopi cos cu  no ta bon”, Hessels a manifesta.

El a declara cu por wak for di e investigacion, encuesta di Banco Central cu no solamente tin hopi sospecha di corupcion di parti di pueblo cu tin e percepcion ey, cu ta mas tanto enfoca den gobierno y den parlamento, etc, pero tambe cu e percepcion aki ta creciendo y esey ta un direccion hopi malo.

“Mi ta kere cu no por perde mucho tempo den punta dede, pero nos tin cu wak con nos ta mehora henter e situacion aki. Anto, manera mi a bisa, esaki ta un principio”, Armand Hessels, presidente di SDBA a indica, remarcando cu e meta ta pa mas tanto tur gremio asumi nan responsabilidad pa exigi di gobierno, pa cuminza traha hopi mas integro y segun criterio di bon gobernacion.

“Na momento cu bo tin esey, cu tin mas consenshi cerca e politico, pero tambe cerca esnan cu ta pone e politico eynan. Nan por bisa cu esey ta tarea di Parlamento, pero nos sa cu Parlamento no ta eherce e tarea ey. Anto e ora ey, tanto e Rapport di Calidad como e ultimo estudio cu gobierno a haci, tambe tin un yamada pa nos comunidad, pa nos bira mas critico riba henter e funcionamento di nos sistema politico; anto, pa bin cu recomendacion pa mehora esey. Esey ta un invitacion na e gremio politico y mi ta kere cu nos tin e obligacion di acepta e reto ey pasobra nos tur sa cu cos ta malo, cu nos por sigui riba e ruta ey anto e ora ey nos no mester warda riba e politiconan cu mas nos ta critica, pa nan bay drecha. Ta nos mes tin cu asumi e responsabilidad aki”, Armand Hessels a enfatiza.