Dalgis Montalvo director di Stichting Hunto:
ORANJESTAD (AAN) – Dia 10 y 11 di October aki, FADA a organiza dos encuentro, e prome tabata pa docternan di cas cu tabata pa splica e cambionan den e verwijsbeleid y pa ta mas duidelijk pa nan, unda précis nan por manda un pashent cu tin problema di salud mental.
Asina Dalgis Montalvo di Stichting Hunto, a duna di conoce den un entrevista. El a comenta cu no tur docter di cas tabata presente pero lo percura pa nan haya e informacion, pa nan tambe ta na haltura riba e cambionan cu ta regarda salud mental na Aruba.
“Actualmente loke nos kier ta pa e comunidad y e docternan di cas por sa précis pakico Stichting Hunto tey, y ki tipo di cliente por manda cerca dje, y kico ta e tarea di Respaldo y di con tin cu manda un persona eynan, mescos cu Departamento di Asunto Social Seccion Bida y Famia, y otro instancianan”, Dalgis Montalvo a señala.
El a subraya cu ta importante pa tur instancia concerni y docternan di cas keda update di tur e cambionan cu ta bezig cune, durante henter e temporada aki.
Dalgis a comenta cu e audiencia tabata poco pero esaki ta un inicio. Hunto cu FADA lo sigui trece e charlanan aki dilanti, y uza diferente media y plataformanan pa difundi e informacion na comunidad.
El a agrega cu en principio, e stuurgroep tin diferente grupo di trabao cu mester traha riba nan. E idea pa traha tambe riba otro proyectonan, manera e crisis, entre otro riba salud mental cu mester di atencion. E tarea di stuur groep tambe ta trece e puntonan di atencion na conocemento di ministerionan concerni, AZV, y otro instancianan pa trece cambionan y mira kico tur a wordo haci caba.
