Henter Klas 4 di La Salle College a bishita Prome Minister

Den cuadro di les di ‘staatsinrichting’...

ORANJESTAD (AAN): E siman aki Prome Minister Evelyn Wever-Croes hunto cu Minister di Enseñansa y Deporte Endy Croes, a ricibi bishita di alumnonan di klas 4 di La Salle College.

   E alumnonan den cuadro di nan les di ‘Staatsinrichting’ a bishita Parlamento di Aruba y despues Bestuurskantoor. Na e ocasion Prome Minister a elabora un tiki riba e trabao di un Minister, responsabilidadnan, Conseho di Ministronan y e organo mas halto cu ta tuma decision den gobierno.

   E grupo di studiante tabatin preguntanan hopi interesante specialmente riba e temanan di enseñansa y deporte. Prome Minister a splica e hobennan cu gobierno ta trahando riba mas oportunidad posibel, pero cu Aruba ta keda un Pais chikito. Sinembargo, ta trahando cu Curaçao y Bonaire pa mira si hunto por ofrece mas oportunidad na nos hobennan.

   Por ultimo, Premier Wever-Croes a gradici La Salle College pa e interes demostra y ta kere cu ta sumamente importante pa inculca den nos hobennan e balornan democratico. Den e caso aki, a base di e preguntanan cu nan a haci na Prome Minister, ta mira cu e hobennan ta hopi bon prepara, motiva y cu pasion, cual ta duna speranza pa futuro.