Famoso narador di futbol Lazaro Candal a fayece

ORANJESTAD (AAN): E periodista y narador deportivo, conoci como Lázaro Candal a muri cu 91 aña di edad. 

Esey ta loke su yiu homber, esta e periodista Alex Candal a divulga e siman aki.

   “Cu un profundo dolor, mi ta lamenta di bisa boso cu mi tata a caba di fayece, el a bay den paz rondona pa nos.  Mi ta sinti un tristeza infinito, y mi ta haya confort sabiendo cu awor e ta cu nos mama,” ta loke Alex Candal a bisa den un boletin.  “Venezuela stimabo manera cu abo a stim’e.”

   Lázaro Candal a nace na La Coruña, Spaña dia 4 di December 1931, y el a bira mas conoci cu e nomber di cariño ‘Papaito’ Candal, y tabata un narador dibertido y periodista di deporte na Venezuela den decada di 1980 y 1990, principamente durante weganan di futbol.

   Su nomber di cariño a bin di su famoso frase ‘¿Qué hiciste papaíto?’, cu e ta bisa ora cu un futbolista comete un foul of a hunga di forma ekiboca.  E frase ey a pasa y forma parti di loke Venezolanonan a cuminza bisa cada rato den situacionnan similar den nan bida diario.

   Na comienzo di decada di 1960 e tabata redactor di medionan na varios ciudad na Spaña, y despues a migra pa Venezuela pa traha na e.o. corantnan Ultimas Noticias y El Mundo.

   Aunke el a biba hopi aña na Venezuela, nunca el a papia cu e accent castellano y esey ta pone wordo reconoci facilmente na cualkier lugar of transmision.  Su accent gallego a comberti e ‘Papaito’ ey den un toque dibertido durante cada wega.

   Na Aruba, tabata mire haci naracion di Copa Mundial di Futbol via di RCTV canal 10, y algo cu e tabata hopi famoso pe tambe, ta ora cu e ta anuncia e wega di futbol di e siguiente dia, bisando: “...y mañana, ayyyyy mañanaaa”.

   Via di RCTV el a bira hopi famoso, y a cuminza haya contract pa traha propaganda pa television tambe.  El a gana hopi premio y reconocemento a lo largo di su carera.

   Despues cu Radio Caracas Television a cera na 2007, Lazaro a keda sin trabao, y no a keda otro opcion pa acepta trabao na e canal nobo di TV di estado Venezolano.  Poco aña despues, el a regresa bek na La Coruña na Spaña pa pasa su viehez den paz.