ORANJESTAD (AAN): E organisacion FAVI, Fundacion Arubano di esnan Visualmente Incapacita, ta bay tin un accion di donacion.
Catherine, kende ta e coordinador di e actividad a duna di conoce cu otro aña nan lo ta cumpliendo 50 aña. Nan ta existi desde 1974.
Ta conta cu mas o menos 425 cliente cu tin limitacion cu bista di cual rond di 50 ta activo. E meta di FAVI ta pa yuda guia e personanan cu tin limitacion pa asina por contribui den nan bida segun nan desaroyo, a bisa.
FAVI ta duna servicio gratis cu entre otro chekeo di bista practico, orientacion y mobilidad. Ta duna conseho y tambe informacion general na diferente grupo manera scol, gruponan social como tambe guianan educacional na muchanan, mayor y maestronan, a indica.
Cetty Baarh directorate di FAVI a duna di conoce cu accion aki a cuminsa hopi aña pasa y ta un evento di fundraising hopi grandi pa FAVI pa asina aki por ricibi e fondonan necesario pa sigui ofrece su servicionan.
A sigui bisa cu FAVI ta ricibi un subsidio general di gobierno di Aruba cual ta yuda pa paga e salario di e empleadonan. Ta resta un parti chikito cu ta bay pa e servicio diario di FAVI. Pesey ta hopi importante pa FAVI recauda su mesun fondonan pa por draai 100 %.
Di Augustus pa December, colectantenan boluntario ta yuda FAVI drenta e comunidad pa nan haci e recaudacion di fondo. Nan ta ricibi un lista na unda nan ta acerca personanan vast, pero comunidad henter di Aruba tambe por participa den esaki, Sra. Baarth a remarca.
Por haci donacion pa medio di e cuentanan di banco di FAVI na Aruba Bank y RBC Bank, of pa medio di Paw.aw.
