Famia preocupa cu tin un brote di Covid-19 na St. Michael Paviljoen

ORANJESTAD (AAN): Desde cu Gobierno a divulga Diabierna e cifra semanal di casonan di Covid-19 riba e isla, por a nota cu den un siman di tempo, como 504 persona a test positivo pa Covid-19.

   Como cu cada dia tin hopi hende cu a bira bon bek, na final di siman un total di 281 caso activo tin di hende cu Covid-19 na Aruba.

   Ta parce cu e variante di Omicron keto bay ta presente, y aunke e sintoma ta leve y ya den 5 dia bo a bira bon bek, a compronde cu tin varios ciudadano cu a bira basta malo.  Nan tambe tin dolor inmenso di cabez, di curpa, y tambe a perde holor y smaak.

   Awor ta famianan ta bati alarma, cu ta parce cu lo por tin un kluster di hende malo cu Covid-19 na St. Michael Paviljoen na Playa.  E cas pa hendenan di edad aparentemente ta registrando un seccion cu hopi hende cu e malesa.

   Te ainda ningun informe oficial a wordo duna ni door di Departamento di Salubridad Publico (DVG), ni tampoco Gobierno relaciona cu e posible brote aki na e cas aki.

   Famianan tin miedo cu nada ta wordo haci pa evita cu e brote aki ta sigui plama, esta cu casi nan no ta mira nada di isolacion ta tumando lugar den e seccion ey na Paviljoen.

   Nan ta preocupa, y loke mas ta haci esey algo serio, ta hecho cu siman pasa, DVG a registra oficialmente cu 1 persona mas a fayece di Covid-19 na Aruba.

   Siman pasa na Aruba, den Dr. Horacio Oduber Hospital tabatin 2 persona interna cu of debi na COVID-19 di cual 1 ta riba piso general y 1 den Unidad di Intensive Care.