Smartphone cu tabata charge casi a kima full un cas na Paradijswijk

Polis a bay duna famia un man

ORANJESTAD (AAN): Diabierna atardi, un cantidad di yamada a cuminza drenta tanto na Centro di Alarma 911, como tambe Central di Polis, indicando cu un cas den Caya Frere Fredericus na Paradijswijk ta na candela.

   Inmediatamente un unidad di Polis, como tambe un Truck di Bombero for di Post Tango na Tanki Flip a sali rumbo pa e lugar.

   Ora cu a yega na e cas Caya Frere Fredericus 10A, cu ta keda riba e caya paralel pariba di Centro di Bario Playa Pabao, a bin haya un candela cu ta saliendo cu vlamnan grandi caba for di e camber mas dilanti di e cas.  Y famianan hopi spanta cu speranza cu Bomberonan lo sa di paga e candela mesora.

   Y esey ta exactamente loke e profesionalnan di Bombero a haci, y a paga e candela mesora.  Aunke a causa daño di awa na e demas area di e cas.

   Loke a start e candela te ainda ta e teoria, cu e lithium-ion battery di un smartphone cu tabata charge e momento ey den e camber, lo a explota y start un candela feroz.

   Polis a pidi presencia di Ambulans tambe na e lugar pa bin duna un man, como cu e famia keto bay ta den shock.  Personal di Bureau Slachtofferhulp tambe a wordo busca pa sostene e famia.

   E bista di e famia yen di susto y tristo mirando con nan cas a kima parciamente, tabata fuerte.  E daño di huma y awa a pone cu nan no por bay habita e cas por lo pronto.

   Pesey DIARIO a keda satisfecho di mira con riba Diasabra, Polis di bario di Oranjestad a mira e necesidad y ta sinti cu nan a worde yama di curason pa duna un man y yuda e famia cu a worde afecta.

   Polisnan a logra pone man na obra y mesora a logra haya un baki pa hinca tur e sushinan aden, a yama demas Polisnan pa duna un man y henter un bario a sali y a respalda tanto e famia cu e polis cu e limpiesa. Hunto cu slachtofferhulp a coordina e yudansa aki cu a cana den bon coordinacion cu e famia, Polis di Bario y tambe full un comunidad.