Famia preocupa cu paradero di Ishma Werleman

Nan ta sospecha cu el a perde na e cas di su casa

ORANJESTAD (AAN):  Sra. Danila Rincones ta mama di Ishma Werleman, ken tin algun dia cu e famia no sa di nan paradero. Sra. Rincones a declara cu su yiu a sali for di e Fundacion Contra Violencia Relacional 9:50 am bisando cu e ta bay bek cerca su casa.

            Parce cu e pareha tabata tin algun problema door di alcoholismo di e meneer y pesey Ishma mes a tuma e decision pa bay keda na FCVR cu su yiunan. Den pasado tabatin denuncia mas cu un biaha na Recherche pa violencia domestico. Pero awor su paradero ta desconoci.

            E famia ta kere cu Ishma lo por a haya un 'lift' ora cu el a bandona FCVR. E tabata tin un saco di cuminda den su man y e no por a bay leu asina facil.

            E dia ey, nan a keda busk'e, pero e famia a haya confirmacion cu el a yega cerca e casa. Esaki tabata diaranson mainta.

            Despues, diahuebs anochi 7'or y mey e casa di Ishma a yama Sra. Danila bis'e si e sa algo di su yiu. E ta haya esaki straño pasobra e ta esun cu lo a tum'e diaranson y awor el a puntra si e sa algo di Ishma. "Mi yiu a keda cu bo", el a bis'e.

            E homber a bisa cu el a manda Ishma bek pa e fundacion y for di e momento ey, e famia no sa mas di e paradero di Ishma.

            E famia ta preocupa tambe pasobra segun nan, e casa tabata manipul'e pa e bay cas bek y cu palabranan dushi e casa a logra. Actualmente, e yiunan di Ishma ta cerca dje, a indica.
            Pesey e ta pidi pueblo pa si acaso mira Ishma den becindario pa yama Polis na number 100 of yam'e na 641-2426 of 630-6930. "Mi no sa nada di e paradero di mi yiu, unda e ta, kico a pas'e, ken por tin'e scondi", a expresa.  

            Ishma a wordo mira ultimo biaha cu un carson y blusa preto, cu un tas blauw. Polis na ta altura, Sra. Rincones a laga sa y cu nan ta coriendo rond relaciona cu e caso aki.