ORANJESTAD (AAN): Pa diadomingo 1 di october lo tin un fundraising pa asina yuda famia Bedoya cu recientemente a perde nan cas y nan pertenencianan durante un candela na Modanza.
E actividad ta wordo organisa door di George Winterdaal di GLW Foundation.
Diasabra 30 di September ta bay cuminsa cu un colecta ariba caya. E hobennan di Miss Teen Aruba International lo duna nan aporte y lo ta ariba caya realisando e colecta aki.
Esaki ta wordo combina cu un evento riba diadomingo 1 di October cu bendemento di cuminda na Centro di Bario Tanki Leendert cu ta cuminsa 10 am te cu 4 pm.
George Winterdaal a duna di conoce cu e famia a logra haya un cas for di FCCA y nan a comoda eyden temporalmente, cu e posibilidad di mira si por reconstrui nan cas.
Loke falta aworaki ta pa cera e placa pa cumpra e cosnan cu falta manera remedinan, bril, mashin di coy presion, entre otro, a bisa.
Ta trata akinan di un pareha di 84 y 85 aña cu a perde tur cos. Nan ta sufri di diabetes y ta hopi importante pa nan tin tur locual nan mester pa controla nan malesa.
Tur yudansa ta bon bini. Pa ayudo of donacion por contacta George Winterdaal na 561-6151.
