Den e prome 6 lunanan di 2023
*Director di AZV ta splica proceso di control
ORANJESTAD (AAN): Edwin Jacobs cu ta director di e organo ehecutivo di AZV a duna di conoce cu nan ta traha cu un compania cu ta esun encarga di realisa auditoria di tur factura pa servicionan medico cu ta drenta pa loke ta tratamento di pashent na Colombia.
E tabata enfatico den bisa cu den caso cu si un test of tratamento a tuma lugar den un periodo cu no tin aprobacion p'e, e ta wordo rechasa. AZV no ta pag'e y ta mand'e bek na e hospital. Asina full un control ta tuma lugar, a indica.
Na momento cu tin cosnan cu no ta cuadra, RGC ta rechasa y ta manda esaki bek pa e clinica responsabilisa. Ora cu RGC ta bisa cu e facturacion ta completo y corecto conforme e contract, nan ta mand'e pa departamento di declaracion di AZV pa e proceso di pago inicia, Jacobs a declara.
Aworaki ta den un proceso caminda ta bay inicia cu contractnan nobo. Den e ultimo dianan a repasa e oportunidadnan adicional cu tin y cu AZV por añadi den nan contractnan pa haci e procesonan mas eficiente.
Un di e criticanan cu ta tende ta tocante e estadianan. E aña aki a cuminsa caba cu e control di e estadianan den hospital, si realmente tabata necesario pa e pashentnan keda of no. Tambe ta controla si e mashin lo a daña y no por a duna tratamento na ora. E dianan ey AZV no ta conta pa loke ta e pago, a bisa. Tampoco ta paga e 'daggeld vergoeding' ni e hotel tampoco. Si a traha un afspraak cu un specialista y a yega eynan y e specialista no tey, tampoco ta wordo paga.
Riba tur esaki a cuminsa haci control y ta mira cu den e prome 6 lunanan ya caba tin 2.2 % di e facturanan cu a wordo presenta door di e clinicanan cu nan pago a wordo rechasa, a indica. AZV no a paga nan.
Aworaki e intencion ta pa den e contractnan nobo regla no solamente esnan cu ta wordo hospitalisa, pero esnan cu ta bay pa haya tratamento ambulatorio. Tur locual ta sosode pa cuenta di e clinica, e clinica tin cu carga e riesgo ey, Jacobs a remarca.
Esaki ta un oportunidad pa haci cambionan, a indica, y pa sigui mehora e eficiencia.
