Famia Planea Aruba ta un pilar esencial pa salud y bienestar di comunidad

AVP ta felicita e organizacion cu su 55 aniversario:

ORANJESTAD (AAN):  Na nomber di e miembronan di fraccion di Partido di Pueblo Arubano (AVP), ta expresa nos mas profundo respet y admiracion pa Famia Planea Aruba cu ta celebra su 55 aña di labor na beneficio di nos isla. Durante cinco decada y mey, e organizacion aki ta un pilar fundamental pa promocion di salud sexual, derechonan reproductivo y bienestar integral na Aruba.

   Famia Planea Aruba a demostra su compromiso continuo pa duna acceso igual na informacion, educacion y servicio relaciona cu sexualidad, planificacion di famia y salud reproductivo. Nan mision — pa garantisa cu tur persona por haya servicio, orientacion y educacion sin discriminacion — ta refleha den tur tayer, consulta personal, sesion di orientacion y conseho disponibel pa hoben, adulto y famianan.

   Durante 55 aña, Famia Planea Aruba a amplia su alcance pa sirbi como un centro integral di salud sexual y bienestar. Awendia nan ta ofrece educacion sexual comprensivo, orientacion personal, acceso na metodonan anticonceptivo, atencion di salud reproductivo, guia pa programanan escolar, conseho di salud sexual y un plataforma di consulta online disponibel pa duna informacion sigur y confiabel.

   E impacto di nan trabao riba comunidad Arubiano no por nenga. Muchanan, famianan y generacionnan henter a haya informacion cla y sosten den un area cu hopi biaha por ta tabu. A traves di sensibilisacion, educacion y accesibilidad, Famia Planea Aruba a contribui no solamente na bienestar di individuonan, pero tambe na fortaleza di famia, prevencion di embaraso no desea y promocion di responsabilidad social.

Nos ta expresa tambe nos agradecimento profundo pa Famia Planea Aruba su Directora Sra Evelyn Ras- Yarzagaray y su ekipo, directiva y personal.

   Fraccion di AVP ta reafirma cu nan ta para pa e trabao di FPA, y lo sigui para na banda di organizacionnan cu ta sirbi e comunidad cu dedicacion y integridad.

   Pa AVP ta un honor reconoce e balor social cu Famia Planea Aruba tin, y nos ta reafirma nos compromiso pa sigui defende organizacionnan di obra social cu ta laga un impacto real den bida di nos hendenan.

   AVP ta felicita Famia Planea Aruba di curazon cu nan 55 aniversario y ta desea nan hopi aña mas di exito y dedicacion.