El a landa 8 ora pa yega tera
- Homber Angel Onofre Cedeño di 21 aña a subi tera na Aruba den marduga
ORANJESTAD (AAN): Tabata Diadomingo atardi, cu personal di Centro Operacional Maritimo di Wardacosta di Caribe Hulandes, a ricibi un yamada relaciona cu un persona perdi riba lama pabao di Aruba.
Autoridadnan a bin haya sa, cu e persona aki a subi riba lama cu un watercraft personal di marca Sea-Doo aproximadamente 3’or di atardi for di area di Fisherman Hut, y momento cu a bati alarma, ainda e persona no a regresa. E Sea-Doo ta uno color blanco cu capa blauw, y asiento preto, registra cu matricula A-1985.
Ta trata di un hende homber (naci na Ecuador) di 21 aña di edad, pero biba na Aruba. Hendenan na canto a perde for di bista, y no tabata ni mira e Sea-Doo mas. Nan tambe a subi lama cu otro Sea-Doo, pero no por a localiza e persona. Pa colmo solo ta baha trempan e dianan aki, pues ya banda di 6:18 pm solo ta baha y bira scur. A cuminza bin cu e teoria cu kizas e motor a daña, of kizas a keda sin gasolin, y awor ta djis keda drief cu coriente di lama y biento di atardi.
Buskeda a cuminza: Centro MOC a ricibi informacion extra, cu e persona ta bisti cu T-Shirt color preto, y un short color geel. Amigonan a confirma cu e tin un jacket salbabida bisti.
Wardacosta a contact e sede na Savaneta, y di aki a saca un boto di reaccion rapido, esta Metal Shark pa busca den area zuidwest di Aruba, y a haci esaki den combinacion cu e helicopter di Wardacosta y tambe e helicopter di Marina Real. Riba VHF Marine Radio, nan tabata transmiti mensahe pa cualkier boto den e area Zuidwest di Aruba pa yuda tira un bista.
Cada uno a keda uza un patronchi di buskeda pabao di Aruba. Diripiente tabata e helicopter di Marina Real a logra di mira e Sea-Doo su so ta drief, na un distancia di mas o menos 5 miya for di costa. Pues no tabatin niun hende riba dje.
Despues a laga e avion Dash 8 di Wardacosta lanta vuelo, como cu e tin ekipo sofistica di FLIR cu por detecta obhetonan riba lama, y nan a bay asisti cu e buskeda pa resto di anochi. For di oriya di lama, por a keda mira e luznan di e Helicopter y e avion ta keda blink riba lama pabao di Aruba.
Hoben cu landamento maratonico: A resulta cu e homber lo a bula for di e Sea-Doo cu tabata keda drief bay leu, y asina el a dicidi na landa rumbo pa tera. Ora cu anochi a yega, el a djis sigui e luznan di Aruba pa keda landa.
Y aparentemente el a landa pa 8 ora largo, y banda di 2:30 am, e yamada a drenta na Central di Polis cu e persona tur cansa y dehidrata a yega na costa.
Vocero di Polis a identifica e hoben Angel Onofre Cedeño di 21 aña di edad, y a indica cu el a wordo hiba Servicio di Emergencia na Dr. Horacio Oduber Hospital pa pasa control. Ademas di yudansa pa trata e su curpa dehidrata, toch relativamente su curpa tabata den bon estado. Pero su tras tin un pesadiya di keda 10 ora riba lama, mirando con e tabata keda drief bay cada biaha mas leu.
