E damanan cu ta dirigi Christina, Faritha y Lila ta duna detaye:
ORANJESTAD (AAN) Durante un entrevista cu Matutino DIARIO cu Fundacion Centro di Famia Piedra Plat, señora Christina Pinilla a hiba palabra, tocante e evento cultural “Fiesta Crioyo, cu lo tuma lugar Diasabra 13 di December awo, anochi, manera su Presidente señor Adriaan Berg a splica den un articulo anterior.
Christina ta encarga, como juffrouw di baile, cu e presentacion di baile, y el a bisa cu nan a traba hopi duro cu un grupo basta grandi tambe, unda lo bay tin un evento multicultural, den cual lo enfatiza den dje.
“Nos ta bay tin ritmonan Latino y ritmonan di Aruba tambe. Nos obhetivo tabata pa trece dilanti cu nos pais ta un isla multicultural, y pa nos siña biba contento cu esey. Anto, nos tabata kier presenta y duna e comunidad e mensahe cu nos tur por biba hunto den armonia, y mustra cu hende Arubiano por balia un ritmo latino of un latino por balia un ritmo Arubiano”, Christina a comenta.
Señora Faritah Luidens, seguidamente, a splica cu su grupo ta bay presenta un obra den cual e baile ta combina cu ne, y e yama “E cahita milagroso”.
“Segun e transcurso di añanan cu mi haya muchanan di seis aña bay ariba te cu adulto mayor, nos a cuminza entrena nan den teatro. Asina cu mi haya sa un tiki di nan, mi a cuminza traha e obra. E obra mi a skirbi’e p’asina represent’e dia 13 di December aki. Asina e ta un combinacion di Christina cu ta duna les di baile y ami cu ta duna Teatro”. Un biaha so e evento aki lo wordo presenta, y Faritah ta haci un yamada na henter pueblo di Aruba pa bin apoya dia 13 di December nos muchanan y adulto mayor.
Finalmente, señora Lila Bisslik a conta cu e ta bay haci un presentacion di tur loke nan a haci for di Mey, pa cu e proyecto “Let’s Art. Esaki ta un proyecto den colaboracion cu CEDE Aruba y nos ta haya financiamento parcial. Y nos ta brida e ora ey oportunidad pa grandi y chikito, cu no tin recurso pa toch siña un habilidad na grandi y chikito, pa desaroya y conoce nan mesun talentonan. Esaki nos ta bay culmina dia 13 di December, den forma di un obra teatral, den cual nos ta bay ilustra tur cos cu e participantenan a siña den esaki” señora Bisslik a duna di conoce.
