Famia di RCA y Inter a despedi di nan gran pilar Jo Westerburger

Cobertura pa cortesia Jan Poets ----ORANJESTAD (AAN): RCA Arena na Solito su bandera tabata poni halfstok, como honor y mustrando lastima pa perdida di nan gran pilar Jo Westerburger.

   Prome cu e acto di entiero Club R.C.A a rindi nan ultimo respet di despedida pa un di nan miembro mas grandi den historia di e organizacion deportivo.

   Presente tabata miembronan y ex miembronan di R.C.A. y tambe su famia. Sr. Ruben Abath, Sr. Udi Hoek y Sr. Eric Gomes, cada un a expresa nan palabranan di profundo condolencia na famia y alaves a conta den breve e grato recuerdonan di e temponan glorioso di Jo Westerburger  como un gran futbolista pa tanto R.C.A y e team veterano Inter.

   Na final su yiu homber Rodney Westerburger a gradici un y tur pa nan presencia.

   Despues e auto Funeral a dal un rond riba e veld di RCA Arena y mey mey di tereno a parkeer pa ricibi su ultimo ayo cu scopmento di bala di su famia: Rodney Westerburger, Arianne Westerburger, Zivon Thode y Elriq Westerburger.

   Boso sirbidor Jan Poets na aña 89-90-91 a hunga den Inter y semper Jo Westerburger tabata presente pa apoya nos. Un tremendo persona cu semper ta tene nos contento cu su jokes. Cu nos amigo Jo Westerburger su Alma sosega na Paz.