Club Kibrahacha ta sigui traha hunto pa un miho bienestar pa adulto mayor

ORANJESTAD (AAN): Tabata e titulo di e evento cu Club Kibrahacha a organiza riba e dianan 30 di september y 1 di october den cuadra di e dia internacional di adulto mayor.

   E evento Hybrid aki tabata consisti di diferente workshop y un Webinar. El a tuma luga na e John F. Kennedy Education Center y e intencion tabata pa trece tur esnan cu ta traha na bienestar di nos adultonan mayor hunto.

   Durante e workshopnan, 4 panelista profesional a trata tema di importancia den e trabao pa nos adultonan mayor.

   Señora Lenny Geervliet a duna un presentacion riba e temanan accesibilidad y tempo liber. Sr. Bart Kool a elabora riba e topico di finansa, Señora Desiree Helder a duna un bista amplio riba nos demografia y vivienda y Dr. Fransis de Windt a presenta un bunita charla riba e tema di nos salud.

   Tabata tin e posibilidad pa participa na e workshopnan y Webinar sea fisicamente of ‘online’ den e sala grandi. E participantenan cu tabata sigui nos online y tambe esnan presente a participa activamente na e diferente workshopnan y tambe e Webinar. Pues un bon interaccion.

   Un parti importante y interesante tabata e charla y presentacion di e “gezondheidspsycholoog, neuropsycholoog y autor Sr. Rene den Haan cu for di Hulanda a duna un charla cu tabata tin como topico: “Oplossingsgericht werken met ouderen”.

Sr. den Haan a duna hopi herment practico na con nos por traha mas den e direccion di e solucion en bes di focus mucho riba e problemanan cu tin.

Hunto cu e participantenan presente como cu esnan cu a sigui e presentacionnan ‘online’ tabata tin despues un discusion sumamente interesante riba e topico: Con nos por haci uzo di e metodo aki den nos bida diario y den nos trabao como profesional.

E team organizador a nota e pregunta, remarke y punto(-nan) di atencion cu e participantenan a trece dilanti y lo pone esakinan hunto den un relato cu e puntonan di atencion y accion pa asina por presenta esaki na ‘Minister van Ouderen Zaken, Dhr. Ursell Arends.

Algun conclusion importante tabata cu e adultonan mayor por haci hopi mas pa nan mes riba tereno di planeamento financiero, nutricion, vivienda of tempo liber. Hopi mas cu por ta nan mes ta pensa… y esaki lo ta un necesidad si ta tuma den consideracion cu den futuro cercano lo tin solamente 3 persona entre edad di 15 pa 65 disponibel pa cada persona mayor di edad .                                                    E proceso di enbehecemento aki na Aruba ta tumando luga hopi rapido. Ta sumamente importante pa para keto na tempo na bo biehes. Con abo kier organiza bo bida pa bo mes despues y con abo ta desea di pasa bo biehes.

Esnan presente a comparti e opinion cu por logra hopi cos cu bon colaboracion entre tur organizacion y fundacion trahando riba e tereno aki.

Club Kibrahacha 60+ kier gradici tur esnan cu a tuma e tempo pa participa na e evento y ta pone un biaha mas enfasis riba e importancia di bon comunicacion entre ‘stakeholders’.                                                                                                                          

Ban uni forsa, pasobra na final nos tur ta para pa e meta comun cual ta traha na bienestar di nos adultonan mayor.

Ta invita cordialmente esnan cu no por a participa na e evento pa bishita e Facebook page di Club Kibrahacha 60+  na unda tin informacion y video live di e evento: “Ban traha hunto na un miho bienestar pa adulto mayor”.  Nan ta gradici e compania ‘Elite Productions & Entertainment ‘cu a haci esaki posibel.