ORANJESTAD (AAN) – Un consumidor a tuma contacto cu nos mesa di redaccion pa comenta cu ora el a bay paga su cobranza di coriente na ELMAR,
el a puntra nan di con tin como seis luna cu su cuenta ta bin asina halto, si realmente e cu su casa ta traha henter dia, te anochi ta cende airco, y un bez pa siman so nan ta laba paña. Kiermen, nan no a cambia nada den nan uso di coriente na cas.
E persona cu a atende cune a puntre si e tin cacho den su cura di cas. E cliente a bise cu si, e tin un cacho chikito cu ta gusta blaf, pero e no ta morde y e ta keda mara den dia. E trahador di ELMAR a bise cu esey ta e problema, cu algun trahador cu ta haci control a haya mordi di cacho, anto nan no ta drenta lesa meter pero nan ta calcula e gasto.
Pa sorpresa di e cliente el a haya yamada di ELMAR cu e biaha aki si nan a drenta lesa e meter, cu hopi cautela, y cu berdad e ta pagando di mas. Nan ta hay kita e diferencia den e siguiente cobranzanan. Wel, menos mal! Pero ta bon pa alerta e consumidornan, pa nan mes keda lesa nan meter y compare cu loke ta wordo mustra den e papel di cobranza, specialmente si nan tin cacho den cas y no tin hende den oranan cu e trahadornan di ELMAR ta pasa lesa e meter.
