Fabio Marcotulli a habri museo di coleccion di PingPong di mas completo na mundo

‘Mi deseo ta cu e coleccion completo keda na Aruba’

ORANJESTAD (AAN): Fabio Marcotulli, a nace na Roma, Italia, e ta un ex-atleta, investigador y escritor cu a dedica gran parti di su bida na estudio di historia di tennis di mesa, esta PingPong. Despues di a representa Venezuela na diferente competencia internacional y publica varios buki riba e deporte, awo el a logra loke e mes ta considera su logro di bida: e coleccion di PingPong di mas completo na mundo, exhibi den su museo na centro di Oranjestad.

   Segun Fabio, e idea pa crea e museo no a nace solamente for di su amor pa PingPong, sino tambe for di un curiosidad profundo pa conoce y preserva historia di e deporte. El a laga sa cu durante añanan di investigacion el a descubri cu hopi informacion cu hende ta kere ta berdad, en realidad ta mitonan cu a wordo ripiti pa hopi tempo.

   E coleccion, cu ta inclui mas di 3.000 raket diferente, ta mustra con e deporte a evoluciona durante mas cu un siglo. Segun Fabio, cada cambio den diseño y material di e raketnan ta refleha e buskeda constante di hende pa mehora nan hugada y logra ventaha riba e competidor.

   Pero e museo no ta limita su mes na PingPong. Tambe tin diferente piesanan historico relaciona cu otro deportenan, manera un bicicleta original di aña 1800 y rolschaats di aña 1890, cu, segun Fabio, ta lanta interes di bishitantenan pa aprecia e evolucion di deporte y tecnologia.

   El a splica cu su pasion pa colecciona ta bin for di su rais italiano, unda apreciacion pa antigüedad y patrimonio cultural ta forma parti di criansa. Sin embargo, e motivacion di mas grandi ta comparti conocemento. “Ora un persona bishita e museo y descubri cosnan cu nunca e no tabata sa, esey ta e satisfaccion di mas grandi,” el a comenta.

   Fabio a revela cu, apesar di tin interes for di coleccionistanan internacional, incluyendo paisnan arabe, e no tin intencion di bende su coleccion. Su mayor deseo ta yega na un acuerdo cu Aruba pa garantisa cu e museo y tur su piesanan historico keda permanentemente na isla.

   “Aruba a duna mi felicidad. Mi kier cu e trabao di un bida completo keda aki pa generacionnan futuro por disfruta y siña di dje,” Fabio a conclui.