Consul Amabel Lugo a comunica cu president Rodriguez
ORANJESTAD (AAN)-- Señora Amabel Lugo Irizarry, Consul General de Segunda, di e Republica Bolivariana di Venezuela na Aruba, den entrevista cu Matutino DIARIO expresa cu ainda e ta purbando di compronde e tragedia asina grandi cu e pueblo Venezolano ta bibando awo.
El a indica cu tur informacion cu e Consulado tin, ta genera pa e Presidente di Venezuela encarga, señora Daisy Rodriguez, cada cierto oranan ta duna informacion tocante e proceso di salbamento y rescate, cu ta e principal tarea cu e Estado Venezolano tin aworaki, y con importante scapa bidanan mas tanto posibel ta, bao di e ruinanan di e edificionan cu a colapsa dia 24 di Juni. Te Diabierna mainta a registra 589 fayecido, 2.980 persona herida, den La Guaira 250 edificio a colapsa, ocho hospital a keda inhabilita, y asina aki a haya un cantidad di daño basta grandi.
“Loke nos kier den e oranan aki cu ta determinante, ta trata di scapa e mayor cantidad di bidanan cu ta bao di escombro. Te cu 2’or di madruga cu ta e ultimo rapport duna pa Presidente Daisy Rodriguez, a surgi 214 Aftershocks. Esaki kiermen cu e actividad sismico ainda ta presente. P’esey loke gobierno ta pidi pa e hendenan keda den nan cas y permiti cu e rescatistanan, tanto nacional como internacional, suma nan mes na e labornan di buskeda y rescate”, señora Amabel Lugo a duna di conoce.
