EZ Party Solutions lo forma parti di Panda Live Show di Fundacion Respeta Mi

Imelda Geerman:

ORANJESTAD (AAN): E compania local EZ Party Solutions lo forma parti di Panda Live Show, un proyecto di conscientisacion di Fundacion Respeta Mi den cuadro di su di 35 aniversario. E evento lo tuma luga den luna di december y ta dirigi na muchanan di 4 pa 6 aña, cu e meta di hiba e mensahe di e fundacion na muchanan rond Aruba.

   Directora di EZ Party Solutions, señora Imelda Geerman, a duna di conoce cu desde e prome momento el a acepta cu entusiasmo pa colabora cu e bunita iniciativa aki.

   EZ Party Solutions ta conoci pa anima fiesta di mucha y crea momentonan di alegria cu ta laga un sonrisa riba cara di cada mucha. Den e proyecto aki, su aporte lo ta pa presenta e mensahe di Fundacion Respeta Mi di un manera interactivo y adapta na edad di e muchanan. Pa medio di baile y presentacion, y siguiendo e guianan di e fundacion, nan lo contribui na haci e mensahe mas facil pa comprende.

   Geerman a destaca cu Panda Live Show ta priminti di ta un show yen di energia, caminda Panda y su amigonan lo trece e mensahe “No ta mishi” di un manera cu ta capta atencion di e muchanan y laga un impresion duradero.

   El a agrega cu, ademas di e presentacion di Panda y su amigonan, e programa lo inclui otro shownan sorpresa pa e muchanan.

   Pa finalisa, Geerman ta invita comunidad pa sostene e iniciativa, cu ta combina entretenimento cu un mensahe importante pa bienestar y proteccion di nos muchanan. Cu Panda Live Show, Fundacion Respeta Mi y su colaboradornan kier contribui na un Aruba caminda cada mucha ta sinti su mes sigur, respeta y scucha.