Presidente di Parlamento Marlon Sneek:
ORANJESTAD (AAN)- President di Parlamento, señor Marlon Sneek, den entrevista cu DIARIO pa e ultimo simannan di e aña cu ta keda, Parlamento tin Presupuesto Supletorio pa atende, y Presupuesto mes.
E Presupuesto Supletorio a bay caba cu su preguntanan cu tabata un total di 1500 y cu Gobierno tin cu contesta pa manda bek, y Presupuesto mes a bay bek cu 1.800 pregunta.
“Tambe nos tin cu haya e contestanan ey pa yama reunion publico, nos ta na spera di e ley, den e caso aki di e di dos presupuesto supletorio, p’asina nos por pone un fecha pa haci pregunta.
Si nos por a scucha bon, gobierno ta papia di e Ley di Salario Minimo pa trec’e mas cerca di e bestaansminimum, pero e ley no a yega cerca nos ainda. Mi a bin compronde cu e ta sigui su trayecto pa yega na Raad van Advies, pa despues gobierno elabora riba e consehonan aki y pa e yega Parlamento pa nos por trata esaki” Presidente di Parlamento a splica.
El a agrega cu tambe e Ley pa amplia e uitkeuring pa personanan cu limitacion, y mi a compronde cu e ta den su fase final pa yega Parlamento, unda cu ta bay pone, den e caso aki, un persona cu ta cay bao e subsidio aki, y cu ta bin na remarca p’e na e momento cu e cumpli 18 aña di edad, cue bira adulto.
“E idea di e ley aki ta pa yuda e famianan pa manera cu e mucha nace y wordo diagnostica di e condicion aki, e famia por haya un sosten financiero pa e famia tin un miho estilo di bida, pa e yiu aki”, Presidente di Parlamento a señala.
El a agrega cu esakinan ta e leynan cu tin aworaki den “pipeline” ademas di e Fondo di Inversion cu tambe tin cu yega Parlamento.
“Pa loke ta presupuesto, e presupuesto di Ombudsman, ARA y Parlamento, a trata nan caba den un reunion publico, nos ta bay tin un reunion publico riba e cuentanan annual di 2020, y na spera di e contestacionnan di gobierno riba esnan cu nos a manda caba y esnan cu mester yega pa haci pregunta ainda, pa nos caba cu nan prome cu e aña aki caba”, Presidente di Parlamento Marlon Sneek a indica.
