Exposicion solo di artista visual Danilo Geerman na Biblioteca Nacional

ORANJESTAD (AAN):  Biblioteca Nacional Aruba ta presenta un exposicion di artista Danilo Geerman.

Esaki ta habri diabierna dia 5 di mei pa 18:30 PM.Un y tur ta keda cordialmente invita pa bishita e exposicion titula ‘Daylight Dreamscapes’ aki cu lo ta habri te cu dia 26 di Mei durante orario regular di biblioteca na Playa. Apertura ta diabierna dia 5 di mei pa 18:30 PM.

            E conocido artista Danilo Geerman ta presenta su tan espera exposicion solo na Mei.

Pa cu e exposicion cu lo bai tuma lugar awor, Danilo ta trece padilanti un serie di obra cu e la traha e ultimo añanan. Mayoria di obra ta oleo riba canvas, (cual ta su specialidad) pero tambe manera cu ta conoci di dje e lo bin cu otro media (material) tambe, mirando cu e ta traha den diferente disciplina.

            Ta cinco aña pasa cu Danilo tawata tin su ultimo exposicion solo, esey tawata den colaboracion cu Ateliers ’89, den e sala na unda tawata Unle Luis Store na San Nicolas. E tempo ey e exposicion a haya un bon acohida di publico en general. Durante e tempo cu a pasa Danilo no a para keto pero a sigui traha riba su arte y riba su network y otro aspecto di su practica. Danilo a particpa na exposicionnan den grupo si.

            Danilo a negocia cu 2 galeria na New York, pa haya representacion den nan, pero durante pandemia tur 2 cera nan porta. Esey ta haci cu e mester a cuminsa full di nobo.

Na februari e aña aki e tawata na Mexico City, unda tin e Art Fair mas grandi di Latino America. Aki Danilo a haya contacto cu otro galeria. Tambe e la bishita varios galeria den e periodo cu e tawata eynan, descubriendo cu Mexico City ta e capital di arte den Latino America. Tambe el a realisa un proyecto den Taller Grafica Nahual den centro di ciudad. Danilo ta presenta su obranan via su Blog.