ORANJESTAD (AAN): Bon carga y empaketa, awe Diaranzon 3 di Mei 2023 e destacamento di ayudo den emergencia di Defensa den Region Caribe Hulandes ta sali pa Islanan Ariba.
E Escuadron di Marinier desde Aruba, Militarnan di Region Caribe, e 43 Compagnie in de West y e barco di apoyo Zr.Ms. Pelikaan tambe ta sali desde Curaçao.
E Militarnan ayanan lo bay ehecuta e ehercicio anual di yudanza den emergencia y prome auxilio durante horcan (HUREX). Special ta ku e aña aki tambe Minister di Defensa di Hulanda, Kajsa Ollongren, lo haci un bishita na e ehercicio na St. Maarten.
For di awe, como 500 Militar ta prepara nan mes den Region Caribe, pa ayudo di prome auxilio despues cu un horcan pasa. E estrago cu horcan Irma a ocasiona na 2017, ta graba cerca hopi den nan memoria. Ta importante pa brinda bon yudanza mas pronto posibel. Ta p’esei Defensa ta train un biaha pa aña, anticipando e temporada di horcan, tocante kico nan mester y por haci e momento ey.
E ehercicio ta socede rond di e islanan, St. Maarten, Saba y St. Eustatius. Riba programa tin entre otro e structuranan di e Comision di Crisis y mantenimento di orden y seguridad publico. Pero tambe hacimento di zonanan afecta accesible, evacuacion di habitantenan y entrega directo di yudansa di emergencia y prome auxilio. E ehercicio ta dura te cu Dialuna 8 di Mei.
Minister di Defensa: E aña aki Minister di Defensa di Hulanda Kajsa Ollongren, tambe ta uni su mes na e ehercicio di yudansa di emergencia durante horcan. Durante su bishita na St. Maarten entre otro pa medio di demostracionnan lo e mira di ki forma Defensa ta colabora durante un desastre natural cu autoridadnan local.
