Exportacion for di Coro te cu islanan ABC a cay cu 69.54%

Desde cu a habri frontera pa barconan chikito di carga

• Esaki debi na dificultad pa haya Diesel na Venezuela
• Nan ta registra tur producto cu ta wordo exporta 

ORANJESTAD (AAN): Manera por corda, tabata luna di Mei 2023 cu primeramente Curaçao a habri su frontera di lama bek cu Venezuela, y mesora varios barco chikito conteniendo fruta y berdura y algun material mas a cuminza sali for di e waf di La Vela di Coro na estado Falcon, rumbo pa Islanan ABC.

   Awor cu 16 luna a pasa, prensa na Venezuela a check cu Camara di Comercio di La Vela (estado Falcon) pa haya sa con e exportacion ta bayendo.

   Juan Gotopo di Camara di Comercio, a bisa cu segun nan registronan, un total di 5.280 ton di carga a sali for di Venezuela rumbo pa Islanan ABC.  Mayoria di esaki ta consisti di fruta y berdura, pero tambe a inclui material di construccion, gordura, pochi di mata, y tambe planta y demas mata.  Un producto nobo cu a wordo inclui tambe ta pisca.  Di esaki como 8 ton a sali for di e waf di La Vela rumbo pa Curaçao.

   No obstante e variedad di productonan aki, toch awor tin un preocupacion.  Un analisis haci pa cu luna di September 2024, a divulga cu e cifranan di exportacion a cay cu 69,54%, compara cu September 2023.  E motibo principal ta e problema pa e barconan aki haya Diesel pa nan motornan.  Esaki tabata un dolor di cabez den e prome dos siman di e luna.  Tambe a bin cu algun barco cu tabata usa waf di La Vela pa bay Curaçao, awor a cambia di waf.

   Pa e prome semester di 2024, for di waf di La Vela a sali 2.698 ton, di cual 2.035 ton (cu ta como 75%) a bay pa Curaçao, y 23% (cu ta como 630 kilo) a bay pa Aruba.

   Den e mesun semester aki, Aruba a importa for di rond mundo como 53 miyon Dollar na producto, cu ta un suma significante, cual, compara cu e cifranan di Waf di La Vela, ta representa un suministro di 1%.